هادی زیائەدینی ساڵی 1956 لە گەڕەکی جەوراوای شاری سنە لەدایك بووە. لە ساڵی 1977 چووەتە كۆلێژی هونەرە جوانەكانی زانكۆی تاران و لە ژێر چاودێریی یەكەمین مامۆستای خۆی، "هانیبال ئەلخاس"، هونەرمەندی ئاشووری، لەگەڵ ناخی بایەخەكانی هێڵكاری ئاشنا بووە. لەو كاتەوە تا ئێستا یەكێكە لە چالاکترین شێوەكاران و پەیکەرسازان لەسەر ئاستی وڵاتی ئێرانە.
لە ماوەی ساڵانی رابردوودا هادی زیائەدینی كاری تاشینی پەیكەرەكانی نالی، شێخ ڕەزا تاڵەبانی، شەڕەفخانی بتلیسی، "شوان" ، "ئازادی" ، "دوو زارۆک" ، "مەولەویی كورد" ، "كرێكار" و پلانی نەخشی بەرجەستەی "سەربازی مادی" لە شاری سنه، پەیكەرەكانی "هەژار" ، "هێمن" و "محەمەد قازی"ی لە شاری مهاباد، پەیکەرەی "حەسەن زیرەک"ی لە بۆکان، پەیكەرەی "میر عیماد قەزوینی"ی لە شاری قەزوین، پەیكەرەی "شێخ مەحموود بەرزنجی"ی لە شاری سلێمانی، پەیكەرەكانی "مەستوورەی ئەردەڵان" و "جگەرخوێن"ی لە شاری هەولێر و سەردیسی چەندین كەسایەتیی هونەری، ئەدەبی و ناودارانی كوردی بۆ "مۆزەخانەی خەڵك ناسیی ماڵی ئاسەف" لە شاری سنە دروست كردووە و دایبەستووە.
کاراکتێر دیزاینێر: هێمن قارەمانی
کەم شار هەیە لە ئێران، پەیکەرێکی دروستکراوی هادی زیائەدینیی لێ دانەنرابێت. کەم شاخ و بەردی ڕۆژهەڵات هەیە، جێ پەنجەی هادیی پەیکەرتاشی لەسەر بەجێ نەمابێت. ئەو لە شەستەکانی تەمەنیدایە و زیاتر لە ٤٠ ساڵە، دەست و پەنجەی لەگەڵ بەردەکان نەرم کردووە و لەڕێگەی هونەرەکەیەوە، ڕۆحیان بەبەردا دەکات.
کەم کەسایەتی هەن کە لەم ئاست و تواناییەدا بگەڕێنەوە کوردستان و دەرد و خەم ومەینەتی خاک و وڵاتی خۆیان وێنا بکەن. کاک هادی توانی بەشێوەیەکی ئاکادێمیک سەدان کەس پەروەردە بکات و شەپۆلێکی هونەری شێوەکاری لە کوردستان بخاتە گەڕ.
وەک هانیباڵ ئەڵخاس باس دەکات: هادی یەکێک لە باشترینەکانی کوردستان و ئێرانە کە بە ویژدانێکی مرۆڤانەوە گەڕایەوە زێدی باب و باپیرانی خۆی و توانی وەک کۆلێژێکی ئاکادێمیکی هونەری، سنە بکاتە پێتەختی هونەر و یەکەم بنچینەکانی هونەری شێوەکاری لە کوردستان دابمەزرێنێ.
کاک هادی وەک خۆی باس دەکات کەمتر کەسێک مابوو لەسنە کە وێنای نەکردبێت. لە خەڵکی ئاساییی سەرشەقامەوە تا دەروێشەکانی خانەقا و مزگەوت و کۆڕی زیکرەکان. لە ژنە باڵابەرزە شۆخ و شەنگەکانی سنەوە هەتا کارەساتەدڵتەزێنەکانی هاوچەرخ.
هادی مرۆڤێکی بەتوانا و بەئەزموون و سادە و ساکارە کە ڕۆژ و شەوی بە هێڵ و ڕەنگ و باڕست دێت و دەچێ.
