قادر سۆفیانی کە بە ناوی هونەریی "قادۆ" ناسرابوو، مانگی ئاداری ساڵی ١٩٤١ لە گوندی "عومەراوا"ی ناوچەی سۆما- برادۆست سەر بە شاری ورمێ لەدایک بووە. قادۆ تەمەنی ٦ مانگە بووە کە باوکی کۆچی دواییی کردووە. ئەو و دایکی بەتەنها ژیاون و لە سەرەتاوە چارەنووس لەگەڵیان یار نەبووە و لە ژیاندا تووشی زۆر سەختی و چەرمەسەری بوونەتەوە. مامی موڵک و ماڵی ئەوان و هەموو شتێکیان لێ دەستێنێت و قادۆ و دایکی ژیانێکی زۆر سەخت بەسەر دەبەن. دواتر بەهۆی هەژاری و دابونەریتی کۆمەڵگە کە باس لەوە دەکەن ژنێکی گەنج ناتوانێت بە تەنیا لەگەڵ منداڵێکدا بژی، دایکی ناچار دەبێت هاوسەرگیری بکات. بەڵام هاوسەرەکەی لەگەڵ قادۆ ڕەفتاری باش نابێت و دایکی بەهۆی ئەوەوە هاوسەرەکەی بەجێ دەهێڵێت. زۆر ناخایەنێت دایکی قادۆ دیسانەوە هاوسەرگیری دەکاتەوە.
کاتێک دەبێتە منداڵێکی ٩-١٠ ساڵان، تێدەگات کە دایکی بۆ ئەوەی قادۆ بتوانێت بە ئازادی بژی و کەس بێزاری نەکات، چەندە ئازاری چەشتووە. قادۆ چیتر لە ئازاری دەربەدەری و غەریبیی خۆی و دایکی تێدەگات و لەسەر هەژاریی خۆی و دایکی کەلام چێ دەکات و دەیکاتە گۆرانی. وەک خۆی دەڵێت:
قادۆ کەسێکی خوێندەوار نەبووە، بەڵام عەقڵ و مێشکێکی وای هەبووە کە بۆ خۆی شیعری کەلامەکانی ئامادە کردووە و کردوویەتی بە گۆرانی. خێرا ئەو کەلامانەی لەبەر دەکرد و دەیگوتەوە کە کەیفی پێ دەهاتن، بەڵام هیچ کەیفی بەو کەلامانە نەدەهات کە لەگەڵیدا نەدەگونجا.
کاتێک قادۆ لاوێکی تەمەن ١٧-١٨ ساڵ بوو، لە گوندی "هەشتیان" لە ناوچەی سۆما- برادۆست دەنگبێژێک بە ناوی "سلێمان" هەبوو، کە لەگەڵ قادۆ وەک دەستەبرا بوون. سلێمان کەسێکی زۆر باش بووە و وەک مامۆستا زۆر کەلامی فێری قادۆ کردووە. سلێمان کەلامی دروست دەکرد و قادۆش بە دەنگە خۆشەکەی دەیگوتەوە و لە سلێمانەوە فێری دەنگبێژی بووە. هەر بۆیە قادۆ هەمیشە لە هەموو دەنگبێژێک زیاتر، سلێمانی قەبووڵ بووە و وەک مامۆستای خۆی دەیبینی.
زۆر جار هونەرمەندی کۆچکردوو "خالێ برێ" و قادۆ پێکەوە لە دیوەخانان دادەنیشتن و گۆرانییان دەگوتەوە.
دوای ماوەیەک دەنگبێژ "ئەڤدی" لە باکووری کوردستانەوە دێتە ڕۆژهەڵاتی کوردستان و لە قاوەخانەی مەلا جاسۆ دەمێنێتەوە، زۆرێکی لە دەور کۆ دەبووەوە و گوێیان لە گۆرانییەکانی ڕادەگرت، کاتێک قادۆش لەو کۆڕانەدا بەشدار دەبێت، کەسێک لەو کۆڕەدا بە دەنگبێژ ئەڤدی دەڵێت: "قادر دەنگێکی زۆر خۆشی هەیە"، ئەڤدی دەڵێت: "ئادەی کەلامێکمان بۆ بڵێ تا بزانین چۆن دەیڵێیت"، قادۆش گۆرانییەک دەڵێت.
کاتێک ئەڤدی گوێ لە دەنگی ڕادەگرێت، دەڵێت: "خۆم و خودام، تۆ بەڕاستی دەنگبێژیت و واز لە دەنگبێژی مەهێنە، دەنگبێژی لە تۆ پیرۆز و موبارەک بێت."
قادۆ نزیکەی ١٠٠-٢٠٠ کەلامی دەزانی و دەیگوتنەوە. کەلامەکانی قادۆ وەک ئاوێنەیەک ڕاستییەکانی کۆمەڵگەی لەڕووی "ژیان، خۆشەویستی، هەژاری و چەوساندنەوەی گەلی کورد" نیشان دەدا، هەر بۆیە پاڵپشتی و خۆشەویستییەکی تایبەتی لە کۆمەڵگەدا هەبوو. لە دوایین ساڵانی ژیانیدا، بەهۆی ناجێگیربوونی تەندروستیی و هەموو ئەو سەختی و ناخۆشییانەی ژیان کە بەسەریدا هاتبوو، بەداخەوە تەنها ١٠ یان ١٥ کەلامی لەبیردا مابووەوە.
قادۆ گۆرانییەکانی "خالێ برێ، ئەڤدی و حاجی عەبدولکەریم" و زۆر دەنگبێژی گوتووەتەوە کە بەڕاستی دەنگبێژ بوون. قادۆ بۆ خۆی زۆر کەلامی نووسیوە و گوتوویەتی. یەکێک لەو کەلامانەی کە حاجی عەبدولکەریم گوتوویەتی، "دەورێ دەورێ"یە.
لە سەرەتای شۆڕشی گەلانی ئێران واتە ساڵی ١٩٧٩، بەهۆی نەخۆشی و دەرمانکردنی هاوسەرەکەی، قادۆ ماڵەکەی لە گوندی سۆفیان گواستەوە و چووە شارۆچکەی "ئەلواج" لە نزیک شاری ورمێ و لەوێ نیشتەجێ بوو.
بەرهەمی ژیانی هاوبەشی قادۆ ٧ منداڵە، ٥ کچ و ٢ کوڕ. ناوبراو لە تەمەنی ٨٣ ساڵیدا بەهۆی نەخۆشی و وەستانی دڵ لە یەکێک لە نەخۆشخانەکانی شاری ورمێ کۆچی دواییی کرد.
ئامۆژگاریی "قادر سۆفیانی" بۆ نەوەی نوێ کە لە بواری هونەر و دەنگبێژیدا چالاکان، ئەوەیە:
گەنجەکانمان کە لە ئێستادا خەریکی دەنگبێژین، نابێ ڕێگای هونەر و کورد و کوردستان ون بکەن و با کەلامی دەنگبێژانمان ڕاست و دروست بێت و بێ سەرلێشێواوی و بە جوانی بیگەیەننە گەلەکەمان بۆ ئەوەی سوودی لێ وەربگرن."
