ئەڤین تەیفوور
هەموو شوێنێک لەنێو ڕەشاییدا مابوو. بەهۆی ڕەشایییەوە هیچ شتێک نەدەبینرا. ویستی خۆی بگەیەنێتە دەرگاکە و هەندێک تیشکی ڕووناکی ببینێت، بەڵام هەرچەندە لە ژوورەکەدا بە دەوری خۆیدا دەسووڕایەوە، بەهۆی ڕەشایییەوە دەرگای ژوورەکەی نەدەبینی. دەستەکانی بۆ نێو ڕەشاییەکە درێژ کردەوە، ڕەشاییەکەی لە پێش چاوەکانی لابرد. بە سەرسووڕمان و هاوارەوە دەستەکانی بە هەموو دیوارەکانی ژوورەکەدا هێنا، بەڵام دەرگاکەی نەدۆزییەوە. بە ترسەوە ڕووخساری لە ژوورەکەدا دەسووڕاند و بە هەردوو چاوی سەیری هەموو شوێنێکی ژوورەکەی دەکرد، چاوەکانی ماق مابوون و دەیگوت: "دە، دەر، دەری."
لە سەرەوە دەرگا هەبوو، دەرگا. بێ بیرکردنەوە ویستی دەستەکانی بۆ دەرگاکە درێژ بکاتەوە، بەڵام دەستەکانی پێی نەگەیشت، چونکە لە شوێنی خۆیان نەبوون. سەیری پێیەکانی کرد، بەڵام ئەوانیشی پێوە نەبوون و لە جێگاکەدا سست و پووچ مابوون. لەبری شوێنی پێیەکانی، تەنیا خوێن هەبوو. بێ چارە دیسان چاوی خۆی وەک ئاسمانێکی دوور و قووڵ بە ژوورەکەدا گەڕاند، بەڵام دەرگاکە کرایەوە و کۆمەڵێک پێڵاو بەسەریدا کەوتنە خوارەوە. ڕووخساری وەک تەماتەی کوتراو لەنێو پێڵاوەکاندا ون بوو و تەنیا خوێن لە شوێنەکانییانەوە دەڕژا. لە پڕ چاوەکانی کردەوە. دەموچاوی بە ئارەقە داپۆشرابوو. بە زەحمەت خۆی لەنێو جێگاکەدا فڕێ دا. بینی کوڕەکەی پێڵاوەکەی بە دەموچاویدا دەدا و دەرگاکەشی توند داخست. بێ بیرکردنەوە سەیری دەست و پێیەکانی خۆی کرد و هەناسەیەکی قووڵی هەڵمژی.
بە یەکجاری دەرگاکە کرایەوە، هاوژینەکەی چووە ژوورەوە و لە بارودۆخەکەی سەری سووڕما و گوتی: "چیت بەسەردا هاتووە، ئەوەندە ڕادەچەڵەکی؟ ئەگەر ماندوویت، ئەمڕۆ مەچۆ سەر کارەکەت". ئەویش وەک ئەوەی بزانێت هەموو شتێک لە شوێنی خۆیە و ئارامە، سەیری کوڕەکەی کرد و ئەوی وەک پەپوولە هەڵدا. بە توندی لە باوەشی گرت، وەک ئەوەی پێشتر لە باوەشی نەگرتبێت و گوتی: "نا، دەبێ بچمە سەر کارەکەم، هێشتا مانگێک نییە لەسەر کارم کە لە ئێستاوە دەستوور بدەم. هەمیش ڕۆژی لەدایکبوونی کوڕە شیرینەکەم زۆر نزیکە، ئازیزم، بچم و سەری مانگ بگەڕێمەوە و جوانترین پێڵاوی جیهان بۆ کوڕەکەم بهێنم و بیکەم بە دیاری."
لەم دواییانەدا تەنیا ڕەشایی و ماندوویەتی لە ڕووخساریدا دەردەکەوت. لەلایەک ئازاری شەڕ و لەلایەکی ترەوە هەژاری و دەستکورتی. بۆ ماوەیەک حەزی دەکرد لە پاراستنی ئاسایشی وڵاتەکەیدا کار بکات بۆ ئەوەی بۆ یەکەمین ساڵیادی لەدایکبوونی کوڕەکەی، جووتێک پێڵاوی بۆ بکڕێت. ئیتر کوڕەکەی کەوتبووە نێو تەمەنی شەش مانگان و بە پێڵاوە بەرزەکانی باوکی یاریی دەکرد. هەر بۆیە هەمیشە سەیری پێیەکانی دەکرد و دەیگوت:
"با باوکت بە قوربانی پێیەکانت بێت کە لەم گەرمایەی مانگی تەمموزدا دەسووتێت. تەنها شەش- حەوت ڕۆژ ماوە بۆ سەر مانگ، باوکت جوانترین پێڵاو بۆ پێیە ناسکەکانت دەهێنێت کوڕم." کوڕەکەی بە حەسرەتەوە بۆن کرد و خستییە باوەش هاوژینەکەیەوە. چەک و ڕەختی خۆی بەست. هاوژینەکەی لێی پرسی کە ئایا ئەمجارەیان زۆر دەمێنێتەوە، گوتی: "نا ئازیزم، تەنیا پێنج ڕۆژ و دەگەڕێمەوە. تا ئەو کاتە پارەمان دەبێت، باشترین پێڵاو بۆ کوڕەکەم دەکڕم و دەگەڕێمەوە."
ژنەکەی هەناسەیەکی قووڵی هەڵکێشا، سەیری جێگاکەی پشتەوەی کرد و گوتی: "دەزانی لەم کاتانەدا شەڕ لە هەموو شوێنێک هەیە و هەمووان لە شەڕدا تێوەگلاون، ئاگاداری خۆت بە." هەوڵی دا دڵنەواییی بداتەوە و گوتی: "بەڵام ئەوان بۆ ئاسایشی ناوخۆن، ئێمە تەنیا دەچینە سەر خەتی پاراستن. ئێستا لە ناوەڕاستی شەڕداین، جێگەی داخە کە ئەوان پێویستیان بە پاسەوان هەیە و ئێمەش پابەندین بە جێبەجێکردنی ئەو ئەرکە. من پێنج ڕۆژی تر دەگەڕێمەوە." و لە دەرگاکە دەرکەوت و ڕۆیشت.
ڕۆژێک، دوو، سێ، چوار و پێنج تێپەڕی و ڕۆژی گەڕانەوەی هات. لەنێو کارتۆنێکدا پێڵاوێکی پڕ لە خوێنیان بۆ کوڕەکەی هێنا و پێیان گوت: "ئەمە جوانترین پێڵاوی جیهانە کە باوکت بە شایەنی پێی تۆی زانی."
