شادی
کوردشۆپ – "بۆزی سینا" ناوی زنجیرە چیایەکی زاگرۆسی گەورەیە کە بە دووریی ٥٤ کیلۆمەتر لە باشووری ڕۆژئاوای بەنداوی ورمێ و لە ناوچەی مەرگەوەڕی ڕۆژهەڵاتی کوردستان هەڵکەوتووە. بەرزییەکەی ٣٤٨٠ مەترە و یەکێک لە بەرزترین شاخەکانی کوردستانە.
چیای "بۆزی سینا" کە یەکێکە لە بەرزترین شاخەکانی ناوچەی مەرگەوەڕی نزیک شاری ورمێ، لە تەنیشت چیای داڵامپەڕ و هەروەها لە باشووری ناوچەی مەرگەوەڕ هەڵکەوتووە. ئەم چیایە یەکێکە لە جوانترین شوێنەکانی گەشتیاری لە ڕۆژهەڵاتی کوردستان. ئەم شاخە بە دەریاچە و ڕێڕەوە جوانەکانیەوە سەرنجی هەمووان ڕادەکێشێت.
بۆزی سینا لە وەرزی هاویندا زۆر فێنکە و هەموو کاتێک بەفر و سەهۆڵی لێ دەبینرێ و هەر بۆیە ڕۆژانە دەیان گەشتیار دەچنە ئەو شاخە. بەپێی زانیارییەکان بەرزیی لێوارەکانی بەفر لە بۆزی سینا و دالامپەڕ ٤-٦ مەترە و لە هێندێک شوێنیش دەگاتە ١٠ مەتر.
هەرچەندە لە وەرزی هاویندا پلەی گەرمیی هەوا بەرز دەبێتەوە، بەڵام کەم شوێنی وەک بۆزی سینا و دالامپەر لە مەرگەوەڕ و ورمێ هەیە کە خەڵک بتوانن خلیسکێنەی سەر بەفریان تێدا بکەن.
بەهۆی بەرزیی شاخەکەوە کەشوهەوای ئەوێ هەمیشە فێنکە و هەندێکجار تەنانەت ساردە. هەروەها جوانیی سروشتیی ئەو ناوچەیە و شاخەکانی سەرنجی ئەو کەسانە ڕادەکێشن کە بۆ سەردانکردن دەچنە ئەوێ.
ئەگەرچی گەشتیارێکی زۆر روو لەم شوێنە دەکەن، بەڵام بەهۆی خراپیی ڕێگاوبانەکانەوە، گەیشتن بەو شوێنە دژوارە.
