هاونیشتمانان و کوردستانیانی ئازیز
سێ ساڵ لەمەوبەر و لە نەورۆزی 2021 دا ڕێکخراوی کوردشۆپ وەک ڕێکخراوێکی سەربەخۆ بۆ پاراستنی زمان و مێژوو و کەلتوورو کەلەپووری کوردی بە هەوڵێ ژمارەیەک چالاکی مەدەنی و زمانزان و نووسەری کورد دامەزرا.
کوردشۆپ لە ماوەی سێ ساڵ چالاکیی خۆیادا هەوڵی داوە دەنگ و ڕەنگی هەموو کوردان لە سەرانسەری کوردستان بێ و بە بێ جیاوازی ئاوڕ لە سەرجەم بەشەکانی کوردستان بداتەوە و خەڵکی کوردستان بە مێژوو، جوگرافیا، هونەر، زمان، ئەدەبیات، کەلتوور و کەلەپووری ناوچە جیاوازەکانی کوردستان زیاتر ئاشنا بکات.
لە ماوەی ئەم سێ ساڵەدا توانیومانە بە دامەزراندنی ماڵپەڕ و دوو ئەپلیکەیشێن و حەوت پلاتتفۆرم لە تۆڕە کۆمەڵایەتییەکاندا سەدان بابەتی نوێ و بەسوود سەبارەت بەم بوارانە بڵاو بکەینەوە و زیاتر لە سێسەد بەرنامەی ڤیدیۆییش بەرهەم بێنین کە بە شێوەی بەرنامە و ئاڵقە لە کەناڵی یوتوبی کوردشۆپدا بڵاو کراونەتەوە.
هەروەها بە ڕاگەیاندنی خەڵاتی ساڵانەی زارا بۆ خزمەت بە زمانی کوردی لە ساڵی 2022دا ئەم خەڵاتە پێشکەش بە ڕێکخراوی ڤەژین لە ڕۆژهەڵاتی کورستان کرا و لە ساڵی 2023دا پێشکەشمان کرد بە ئەمینە عەمەر، ژنە نووسەری خەڵکی ڕۆژئاوای کوردستان.
کوردشۆپ لەم ماوەیەدا توانیویەتی تۆڕێک لە نووسەرانی دەروەستی کورد بۆ نووسین و توێژینەوە لەسەر هەموو بوارەکانی ژیانی خەڵکی کورستان پێک بێنێ و دەرکەوتەی ئەم هەوڵەش بڵاو بوونەوەی سەدان بابەتی بەسوود لە ماڵپەڕی کوردشۆپدایە کە زۆربەی ئەم بابەتانە لەسەر تەوەرگەلێک نووسراون کە پێشتر بە دەگمەن ئاوڕیان لێ دراوەتەوە.
لە سێهەم ساڵوەگەڕی دامەزراندنی کوردشۆپدا پیرۆزبایی لە هەموو خەڵکی کوردستان و ئەندامان و هاوکارانی دڵسۆزی کوردشۆپ دەکەین و ئاواتەخوازین بە هاوکاریی ئێوە بتوانین لە ئەرکەکانمان بۆ خزمەت بە کورد و کورستان بەردەوام بین.
ڕێکخراوی کوردشۆپ
نەورۆی 2024
