هاونشتیمانییان و خەڵكی تێنووی ڕزگاریی كوردستان

نەورۆز لە مێژووی كەوناراوە تاكوو ئەمڕۆ بۆ نەتەوەی كورد بۆنەیەکی نیشتمانی و هەڵگری واتای ڕزگارییە. بۆیە ئێستاش لە دۆخی داگیرکراویی کوردستاندا، ناكرێ ئەو بۆنەیە تەنیا وەک بۆنەیەکی ئاسایی چاوی لێ بكرێت؛ بەڵکوو دەبێ ببێتە گۆڕەپانێک کە کوردستانییان تێیدا هێز، ئیرادە، بوون و ناسنامەی خۆیان و داگیرکراویی وڵاتەکەیان پێشان بدەن.
هاوسۆزی و یەكگرتوویی و خاوەندارێتیی کۆمەڵگای کوردستان لە بۆنەیەکی وەک نەورۆز، دەتوانێ پانتاییەک لە ململانێ و خەباتی جەماوەری دژ بە داگیرکەر وێنا بكات. بەو مانایە کە کۆمەڵگا لە ئاراستەکردن و دەرکەوتنێكی جەماوەریدا دەبێتە هۆی ئەوەی بە هێز و كاریگەرییەكی ڕاستەوخۆ، بەرانبەر بە داگیرکەرانی کوردستان ڕابوەستێ و پێشان بدات ئەو دۆخەی کە تێیدایە، دۆخێکی سەپاو و داگیرکارییە و دەبێ لەو ڕەوشە ڕزگاری بێت.
لە نەورۆزدا، پێویستە کۆمەڵگای کوردستان جیا لەوەی بیر لە شایی و هەڵپەرکێ بكاتەوە، لە هەمان کاتدا کار بۆ ئەوە بكات کە چۆن پانتاییەک بۆ خەبات ساز بکات. پانتاییەک کە تێیدا یەکگرتوویی و یەکانگیریی کۆمەڵگا، ڕزگاری و سەروەریی نەتەوە و نیشتمان بكاتە مەبەست و ئامانجی سەرەكی، تاکوو ئەو پەیامە بە داگیرکەر بگەیەنێت کە کوردستانییان لە سەنگەری نیشتمانەوە ڕووبەڕووی ئەوان دەبنەوە. سەنگەرێک کە لەگەڵ ژیان و چارەنووسی ئەواندا تێکەڵە.
هەرچەند دۆخی کوردستان بە گشتی لەم قۆناخەدا زۆر لەبار نییە و جۆرێک لە گەلەکۆمەی دژ بە بزاڤی ڕزگاریخوازیی کوردستان لەئارادایە و داگیرکەران حەول دەدەن کوردستانییان تووشی بێهیوایی و  پەرتەوازەیی بكەن، بەڵام بۆنەیەکی وەک نەورۆز دەتوانێ هەڵگری ئەو تایبەتمەندییە بێ کە ئەو دۆخە سەپاوە بەرپەرچ بداتەوە و بە داگیرکەرانی كوردستان پێشان بدات کە بزاڤی ڕزگاریخوازیی کوردستان هێشتا لە سەر پێیە و خەونە گەورەکەی کە ڕزگاری و یەکگرتووییی نیشتمانە، لە دەست نەداوە.
بۆیە داوا دەكەین هاونیشتمانییان بۆ نەورۆزی ئەمساڵ بە هێمایەک وەک مەشخەڵ و لەملكردنی "گوڵوەنی"، یەکگرتوویی و بەهێزییەکەیان پێشانی داگیركەران و جیهانیان بدەن.
داوا لە کوردستانییان دەكەین بە هەڵگرتنی مەشخەڵ لە ئێوارەی نەورۆز، یەکگرتووییی خۆیان نمایش بکەن و نەورۆزی ئەمساڵ بە "نەورۆزی مەشخەڵانی ڕزگاری" ناودێر بكەن و لە چوارچێوەیەکی هێماییدا بوون و ئیرادەی خۆیان پێشان بدەن.

ڕێكخراوی كوردشۆپ
2024/03/06