شێرکۆ ژانزێم
کوردشۆپ - وەک دەزانرێت، هەموو ساڵێک لە ڕۆژی ١٥ی گوڵان کە ڕۆژی زمانی کوردییە، خەڵاتی شیعری "ئارژەن ئاری" ڕادەگەیەنرێت و ئەمساڵیش "ڕێزان دڵژەن"ی لاو بە بەرهەمی خۆی بە ناوی "دەفتەری قەتایی"، ئەو خەڵاتەی بۆ خۆی مسۆگەر کرد.
لە هەڵبژاردنی ئەمساڵدا، عیرفان ئامیدا، لال لالەش، زاهیر کایان، نەجلا ئاری و یەحیا عومەری کە ئەویش لە ساڵی ٢٠١٥دا خەڵاتی شیعری ئارژەن ئاریی وەرگەرتبوو، هەبوون.
بنەماڵەی ئارژەن ئاری و وەشانگەی "سۆر" لە ڕاگەیەندراوێکدا ڕایانگەیاند: "ئێمە وەک ئەو کەسانەی ئەم پێشبڕکێیە ساز دەکەین، پیرۆزبایی لێ دەکەین و هیوادارین گەنجانی کورد بە وزەیان لە بواری ئەدەبی کوردیدا بەرهەمدارتر بن. ئێمە وەک هەموو ساڵێک داوا لە شاعیرانی گەنج دەکەین کە لە پێشبڕکێکانی ساڵانی داهاتوودا بەشداری بکەن. هەروه‌ها داوا له داموده‌زگا کوردییه‌کان ده‌که‌ین کە پشتیوانی و خاوەندارێتی لەم پێشبڕکێیه بکه‌ن. هیوادارین کە ئەو پێشبڕکێیە ببێتە هۆی هاندانێک بۆ قەڵەمی گەنجەکان لە ئەدەبیاتی کوردیدا و پێکەوە لەگەڵ گەنجان، ئەدەبی کوردی بگەیەنینە ئاستێکی زۆر بەرزتر و پێشکەوتووتر."
هەروەها خەڵاتی ڕێزلێنان بەخشرایە "گارۆ پایلان"
گارۆ پایلان کە بە ڕەچەڵەک ئەرمەنییە و ساڵانێکی زۆرە لەنێو کورددا کاری سیاسی دەکات، بەهۆی کارەکانییەوە ڕێزی لێ گیرا و خەڵات کرا.
بنەماڵەی ئارژەن ئاری و وەشانگەی سۆر لە بەیاننامەکەیاندا لەسەر ئەو خەڵاتی ڕێزلێنانە وتیان: "ڕێزدار پایلان، ساڵانێکی زۆرە لە بواری شوناس و پێگەی کوردان چالاکە و خەبات دەکات و لە بواری سیاسیشدا کاری گرینگی بۆ بەدیهێنانی یەکسانی و برایەتیی نێوان گەلان، ئەنجام داوە".
لە داهاتوودا شوێن و ڕێکەوتی پێشکەشکردنی خەڵاتەکە دیاری دەکرێت.
ڕێزان دڵژەن کێیە
ڕێزان دڵژەن ساڵی ٢٠٠٠ لە شاری باتمان لەدایک بووە. ئێستا لە شاری وان خوێندکاری بەشی پزیشکیی ددانە.
شیعر، چیرۆک، وەرگێڕان و نووسینەکانی لە گۆڤار و ماڵپەڕەکانی وەک "نەوبەهار، دڵۆپ، بار هەڵبەست، کوردەچیرۆک و چاندنامە" بڵاو دەکرێنەوە.
