کوردشۆپ- ئێریڤان باروت، کچە وەرزشوانی کوردی خەڵکی شاری دێرسمی باکووری کوردستان، دوای شکستپێهێنانی سەرجەم ڕکابەرەکانی، بووە پاڵەوانی کیک بۆکسینگی جیهان.
ئێریڤان باروت، وەرزشکاری بواری کیک بۆکسینگی خەڵکی دێرسم، چ لە تورکیە و چ لە دەرەوەی وڵات، چەندین سەرکەوتنی گەورەی بەدەست هێناوە؛ ئێستاش بە سەرکەوتن لەو پێشبڕکێیەی کە لە مەجارستان بەڕێوە چوو، نازناوی پاڵەوانی جیهانی لە بواری کیک بۆکسینگ بەدەست هێناوە.
ئێریڤان باروت، لە پاڵەوانێتیی جیهانیی کیک بۆکسینگ کە لە مەجارستان لەنێوان ١٥ تا ١٨ی حوزەیران بەڕێوە چوو، ئەمڕۆ دوای ئەوەی لە ڕکابەرە قەزاخستانییەکەی بردەوە، گەیشتە قۆناغی کۆتایی و لە یاری کۆتاییدا بەرامبەر بە ڕکابەرە پۆڵەندییەکەی بردییەوە و بوو بە پاڵەوانی کیک بۆکسینگی جیهان و کاسەی پاڵەوانێتیی بردەوە.
ئێریڤان باروت، کچێکی تەمەن ٢٢ ساڵە و خەڵکی شاری دێرسمی باکووری کوردستانە و بە شێوەزاری زازاکی قسە دەکات. بەڵام پێش ئێستا، کاتێک لە بەرنامەیەکی تەلەفزیۆنی بەشداریی کرد و ویستی بە زمانی دایکی قسە بکات، بەهۆی هەندێک وشەی تورکی لە قسەکانیدا، ڕەخنەی زۆری لێ گیرا و لەسەر ئەم بابەتەش وتی: ئەم دۆخە بۆ من کارەساتێکە. لەمەودوا یەکێک لە گرینگترین ئەرکەکانم ئەوە دەبێت کە زمانی دایکیم بە باشی فێر ببم، با هەمووان ئەمە بزانن. من وەرزشوانێکی گەنجی دێرسمم، بەڵام لەبەر ئەوەی وەک نوێنەری دێرسم لە جیهاندا سەیر دەکرێم، مانای ئەوە نییە کە گرینگترین ئەرکم بەجێ نەهێنم و بەدڵنیاییەوە ئەو ئەرکە سەرەکییە (قسەکردن بە زمانی دایکی بە دروستی) جێبەجێ دەکەم. بەڵام ئەمە کێشەیەکی کۆمەڵایەتییە و دەمەوێت وا لە هەمووان بکەم بیر لەم کێشەیە بکەنەوە.
