سڵاو و ڕێز

باشترین و پیرۆزترین گوتە، سڵاوێکی ڕێزگرتنە، بۆ گیانی پێشمەرگە پاکڕەوانەکان کە لە سێبەری دڵسۆزی و قارەمانێتیی ئەوان، ئەمڕۆ ئێمە لێرە، لە شاری هەولێری پایتەخت، بە ئازادی کۆ بووینەتەوە و بە ئازادی باسی زمانی کوردی دەکەین، تەنانەت بە خۆشحاڵییەوە زمانزانەکانمان خەڵات دەکەین.

بە ڕاسپاردەی مامۆستا و زمانزانی کوردی ڕۆژاوای کوردستان، وەرگری "خەڵاتی زارا"، "ئەمینە عەمەر" ناسراو بە "کەچا کورد"، کە بە دەیان ساڵ خەبات و تێکۆشانی بۆ زمانی کوردی کردووە و بەهۆی ناجێگیربوونی باری تەندروستییەکەی نەیتوانی لێرە ئامادە بێت، ئیدی بۆ من شانازی و سەربڵندییە کە لەجێی "کەچا کورد" و بە ناوی ئەو دووەمین "خەڵاتی زارا" وەردەگرم و بۆی دەنێرمە ئاڵمانیا کە لەوێ دەژی. لە هەمان کاتدا هیوای تەندروستییەکی باشی بۆ دەخوازین و پیرۆزباییی ئەم خەڵاتە لە خۆی و خۆیشمان دەکەین. ئیدی، شانازییە بۆ من کە نوێنەرایەتیی "کەچا کورد" دەکەم بۆ وەرگرتنی ئەو خەڵاتە بەنرخە.

زمانی کوردی دەیان ساڵە لەلایەن دەسەڵاتە ستەمکارەکانەوە لە هەر چوار پارچەی کوردستان قەدەغە کراوە و زمانناسانیش لەهەمبەردا باجێکی قورسیان داوە، بەڵام سەرەڕای زوڵم و هەوڵدان بۆ گەمارۆدان، پاشخستن و ئاسمیلەکردن، زمانی کوردی توانیویەتی زیندوو، بەهێز، دەوڵەمەند، پارێزراو و ڕوون بمێنێتەوە.

زمانی کوردی وەک زمانەکانی دیکەی جیهان، خاوەن گەنجینەیەکی فەرهەنگی، دەنگسازی، وشەسازی، ڕێزمان، واتاسازی و ڕێنووسییە. خاوەن مێژوویەکی دوورودرێژە، نیشانەکانی گەشەسەندنیشی لە هێز و سامانەکەیدا دیارە، لە سێبەری ئەو بەرهەمە بەنرخانەی کە بەم زمانە داهێنراون، ئێستا بووەتە بناغەی سەرەکیی ناسنامەی گەلی کورد.

بوونی زمانی کوردی گرێدراوە بە بوونی گەلی کوردەوە. هەروەها بوونی گەلی کورد گرێدراوە بە بوونی زمانی کوردییەوە، بۆیە دوژمنی گەلی کورد دوژمنی زمانی کوردییە و دڵسۆزی گەلی کورد بە هەمان شێوە دڵسۆزی زمانی کوردییە.

سڵاو و سپاس بۆ ئێوە ئامادەبووانی بەڕێز.

سڵاو و سپاس بۆ ڕێکخراوی کوردشۆپ کە ساڵانە وەک ڕێزگرتن و پێزانین، "خەڵاتی زارا" پێشکەش بە زمانناسێکی کورد دەکات.

سپاس بۆ هاوڕێیانم لە کۆمیتەی ئامادەکار. بۆ من شانازییەکی دووقات، سێ‌قات و چوارقاتە کە ئەندامی کۆمیتەی ئامادەکاری "خەڵاتی زارا"م.

بۆ من جێگای سەربڵندییە کە دەزگا، ڕاگەیاندن و دامەزراوەکانی زمانی کوردی وەها پێشکەوتنێکی گەورە دەبینن.

سپاس بۆ هۆڵی "سەما" لە "هۆتێلی کاپیتۆڵ" کە بەردەوام شوێنی چالاکیی کەلتووری و ڕۆشنبیری و زمانی کوردییە.