- کوردشۆپ

ڕۆژی سێشەممە ڕێکەوتی 3ی ڕێبەندانی ١٤٠٢ی هەتاوی (٢٣ی مانگی ١ی ٢٠٢٤ی زایینی)، هاوکات لەگەڵ ٢٥مین ساڵڕۆژی کۆچی دواییی مامۆستا "محەممەد ماملێ"، هونەرمەندی ناوداری خەڵکی مەهابادی ڕۆژهەڵاتی کوردستان، لە ڕێوڕەسمێکی بەشکۆدا لە هەولێری پایتەختی هەرێمی کوردستان، بە بەشداریی هونەردۆستان و کۆمەڵێک کەسایەتیی هونەری، ئەدەبی و سیاسی و...، خەڵاتی ساڵانەی "ماملێ" پێشکەش بە مامۆستا "ُشڤان پەروەر"، هونەرمەندی ناوداری خەڵکی باکووری کوردستان کرا.

ئەم ڕێوڕەسمە لەلایەن بەڕێوەبەڕایەتیی گشتیی ڕۆشنبیری و هونەریی هەولێر، مەڵبەندی هونەریی ماملێ و ڕێكخراوی پەرەپێدانی كاری ڕاگەیاندن ڕێكخرا بوو و بە بەشداریی بنەماڵەی مامۆستا ماملێ لە هۆڵی ڕۆشنبیریی هەولێر بەڕێوە چوو.

خەڵاتی ماملێ، وەک هێمایەكی ڕێزلێنان لە هونەرمەندانی ناسراوی كورد، ماوەی ١٥ ساڵه لەلایەن ناوەندی هونەریی "ماملێ‌"وە پێشکەش بەو هونەرمەندە تێکۆشەرانە دەکرێت کە بۆ خزمەتکردنی هونەری ڕەسەنی کوردی تێکۆشاون و ئەمساڵ ئەم خەڵاتە پێشکەشی مامۆستا "شڤان پەروەر" کرا و بەهۆی دواکەوتنی گەشتی ئەو فڕۆکەیەی کە بڕیار بوو مامۆستا شڤان پەروەر لە ئەڵمانیاوە پێی بێتە هەولێر، ناوبراو نەیتوانی خۆی بگەیەنێتە ڕێوڕەسمەکە و بە دەستی خۆی خەڵاتەکە وەربگرێت. بەڵام خەڵاتەکە بە نوێنەرایەتی درایە مامۆستا "عەزیز شارۆخ"، هونەرمەندی ناسراوی خەڵکی مەهاباد.

لە ماوەی ١٥ ساڵی ڕابردوودا، لە چوارپارچەی کوردستاندا، ئەم مامۆستا، هونەرمەند و لایەنانە خەڵاتی ماملێیان پێ بەخشراوە: "قالە مەڕە، ئەندێریاس ئیسرائیل خەمۆ (باکووری)، عەباس کەمەندی، عەزیز شارۆخ، ناسر ڕەزازی، زۆزان، تیپی مۆسیقای سلێمانی، مەزهەر خالقی، خەلیل خەمگین، حوسێن سەفامەنش، محەممەدڕەزا دارابی، دڵشاد سەعید و کاوە فەقیزادە."

شایانی باسە کە ساڵی ڕابردوو (٢٠٢٣ی زایینی) و هاوکات لەگەڵ شۆڕشی ژینا لە ئێران و ڕۆژهەڵاتی کوردستان، یادی هونەرمەند محەممەد ماملێ لە هەولێر کرایەوە، بەڵام بەهۆی دۆخی ڕۆژهەڵاتی کوردستان و ئێران، خەڵاتی ماملێ بە هیچ هونەرمەندێک نەبەخشرا.

کورتەیەک لەسەر مامۆستا "محەممەد ماملێ":

مامۆستا محەممەد ماملێ، ناوی تەواوی محەممەد سەعید عەلییە، ساڵی ١٩٢٥ی زایینی لە شاری مەهابادی ڕۆژهەڵاتی کوردستان لەدایک بووە و زیاتر لە ٧٠٠ گۆرانیی گوتووە. ناوبراو زیاتر هەڵبەستەکانی شاعیرانی گەورەی کورد مامۆستایان "وەفایی، مارف ئاغایی، گۆران، هەژار موکریانی و هێمن موکریانی"ی کردووەتە گۆرانی و زۆرجاریش خۆی شیعری نووسیوە. ناوبراو ساڵی ١٩٩٩ لە تەمەنی ٧٤ ساڵیدا کۆچی دواییی کرد، بەڵام تاوەکوو ئێستاش هونەرەکەی بە زیندوویی لەنێو خەڵکدا ماوەتەوە.

کورتەیەک لەسەر مامۆستا "شڤان پەروەر":

مامۆستا "شڤان پەروەر"، هونەرمەندی بەناوبانگ و دامەزرێنەری دامەزراوەیەک بە هەمان ناو، ساڵی ١٩٥٥ی زایینی لە گوندی سووریی سەر بە وێرانشار لە پارێزگای ڕحا لە باکووری کوردستان لەدایک بووە. ناوبراو وەکوو هونەرمەندێکی خاوەن هەڵوێست لەلایەن کوردانی چوارگۆشەی جیهانەوە ناسراوە. گرینگیی بەرهەمە هونەرییەکانی شڤان لەمەدایە کە لە هەموو گۆشەکانی کوردستاندا بڵاو بوونەتەوە و زیاتر بە "باڵیۆزی کەلتووریی کوردستانی کۆن و نوێ" لە جیهاندا ناسراوە. ئەو لە ڕێگەی دامەزراوەی ڕۆشنبیریی نێودەوڵەتیی "شڤان پەروەر"ەوە دەیەوێت ببێتە پردێک بۆ زیاتر ناساندن و گەشەپێدان و بەشکردنی فەرهەنگ و مۆسیقای کوردی لە سەرانسەری جیهاندا.