هەموو ساڵێک لە ٢٥ی نۆڤامبەر، هاوکات لەگەڵ ڕۆژی جیهانیی "بەرەنگاربوونەوەی توندوتیژی دژ بە ژنان"، چالاکیی جۆراوجۆر لەلایەن ڕێکخراوە نێودەوڵەتییەکان و چالاکوانانەوە بۆ ڕێگریکردن و بەرەنگاربوونەوەی توندوتیژی دژی ژنان، ئەنجام دەدرێت.
لە هەمان کاتدا ئەم ڕۆژە بە ڕۆژێکی تایبەت دادەنرێت و هەموو ساڵێک لەلایەن چالاکانی مافی ژنان و چالاکانی کۆمەڵگەی مەدەنیی کورد لە هەر چوار پارچەی کوردستان، بە بەڕێوەبردنی سیمینار و ڕێپێوان و کۆبوونەوەی بەرفراوان، گرینگی بەم ڕۆژە دەدرێت.
ژنان لە کۆمەڵگەی جیهانی و بەداخەوە لە کۆمەڵگەی کوردیدا تەنانەت لە هەنووکەشدا ڕۆژانە لەلایەن پیاوان و باوەڕی نێرسالارانەوە، تووشی توندوتیژی دەبن.
لەو کۆمەڵگەیانەی کە ژنان تێیدا ئازاد و سەربەخۆ نین، کەرامەت و هەیبەتی ژنان پێشێل دەکرێت؛ هەروەها لەو کۆمەڵگەگەلەدا گەشەسەندنی فیکری و پەروەردە لە هەموو بوارەکانی ژیاندا لاوازە و کۆمەڵگە ناتوانێت نەوەیەکی تەندروست و زیندوو پێشکەشی کۆمەڵگەی جیهانی بکات.
هەر لەبەر ئەمە، چالاکانی کورد لە بۆنە جیهانییەکانی وەک "٢٥ی نۆڤامبەر" و "٨ی مارس" و هتد، لە هەوڵەکانیان بۆ زیادکردن و بەرزکردنەوەی هۆشیاری و زانیاری سەبارەت بە مافی یەکسان و هاوبەشی نێوان ژنان و پیاوان بەردەوامن.
مێژووی ٢٥ی نۆڤامبەر
لە ٢٥ی نۆڤامبری ١٩٦٠دا لە "کۆماری دۆمینیک"، سێ خوشک بە ناوەکانی "پاتریا، مینێرڤا و ماریا تێرێسا" کە دژی دیکتاتۆریی "تروژیلۆ" خەباتیان دەکرد، هێرشیان کرایە سەر و دواتر کوژران. لە مانگی حوزەیرانی ساڵی ١٩٦٠، پاتریا تێرێسا گەورەترین بزووتنەوەی نهێنی لە دژی دیکتاتۆریی "تروژیلۆ" دامەزراند. هەروەها هەردوو خوشکەکەی بەشداری ئەو بزووتنەوەیە بوون. کاریگەریی ئەو بزووتنەوەیە ئەوەندە گەورە بوو کە لە هەمان ساڵدا دیکتاتۆرییەت ناچار بوو بڵێت، خوشکەکانی "میرابەل" گەورەترین هەڕەشەن بۆ سەریان. دوای ئەم ڕاگەیاندنە، لە ٢٥ی نۆڤامبەری ١٩٦٠دا، سێ خوشکەکە دەستدرێژییان کرایە سەر و پاشان کوژراون. بەڵام ئەو خەباتەی دەستیان پێ کرد تەنانەت دوای مردنیشیان بەردەوام بوو. ئەو بزووتنەوەیە بووە هۆی سەرهەڵدانێک کە لە هەموو شوێنێکدا بڵاو بووەوە و کۆتاییی بە دیکتاتۆرییەت هێنا.
لە کۆبوونەوەی ژنانی ئەمریکای لاتین کە لە ساڵی ١٩٨١ لە کۆلۆمبیا بەڕێوە چوو، بۆ یادی ئەو سێ خوشکەی کە لە پێناو ئازادیدا خەباتیان کرد، ٢٥ی نۆڤامبر وەک ڕۆژی جیهانیی "بەرەنگاربوونەوەی توندوتیژی دژ بە ژنان" دەستنیشان کرا.
