فەیزۆ دوو ساڵ لەمەوبەر تووشی شێرپەنجە ببوو و لە ڕۆژانی کۆتاییی تەمەنیدا باری تەندروستیی باش نەبوو و بەهۆی ئەو نەخۆشییەوە لە ٧ی ئەم مانگەدا کۆچی دوایی کرد و تەرمەکەی لە شاری "کراسنۆدار" بە خاک ئەسپێردرا.
فەیزۆی ڕزۆ برازای دوو دەنگبێژی گەورە و نەمر "شەرۆی برۆ" و "مەجیدی فارس" بوو. ڕزۆ ساڵی ١٩٥٤ لە گوندی "ڤەرمەزیار" لە نزیک ئێریڤانی پایتەختی ئەرمەنستان لەدایک بووە. بنەماڵەکەی لە کوردانی ئێزدییە و لە دوورخستنەوەکانی ساڵی ١٩١٥دا ڕوویان لە وڵاتی ئەرمەنستان کردووە و بەشێکی دیکەی بنەماڵەکەی بۆ وڵاتی جۆرجیا (گورجستان) گواستراونەتەوە.
فەیزۆی ڕزۆ یەکێکە لە دەنگبێژە ناسراوەکانی کۆمەڵگەی ئێزدی و گەلی کورد کە خزمەتێکی ناوازەی پێشکەش بە هونەری کوردی و مۆسیقای کوردی کردووە. هەروەها بنەماڵەکەی، بنەماڵەیەکی هونەرمەند و هونەردۆستن و چونکە برازای ئەو دوو دەنگبێژە بوو (شەرۆی برۆ و مەجیدی فارس)، هەر لە منداڵییەوە خۆی وەک کەسێکی هونەرمەند بینیوە و ئەمەش یەکێکە لەو هۆکارانەی کە تا کۆتاییی تەمەنی، سەرەڕای سەختییەکانی ژیان، وازی لە دەنگبێژی نەهێنا.
ڕزۆ ساڵی ٢٠٠٣ لە شاری ئامەد لە باکووری کوردستان، لە جێژنی نەورۆزدا بەشداریی کردبوو، هەروەها لە چەندین فێستیڤاڵی گەورەدا لەگەڵ بلوورڤان، نەمر "عەگید جمۆ"، بەشدارییان کردبوو و زۆر بەرهەم و گۆرانیی کوردییان پێشکەشی گەلەکەیان کرد.
دەنگبێژ فەیزۆی ڕزۆ، چەندین بەرهەمی لە دوای خۆی بەجێ هێشتووە. بەرهەمەکانی بریتین لە: "گەدە و باڤێ فەقی، حەکیمۆ و دەلالیێ، دەستمالێ و ئۆیی ئۆی ل من."
