شادی

کوردشۆپ - ئۆپێرای مەم و زین لە فێستیڤاڵی نێودەوڵەتیی گوڵان لە ویلایەتی هێسنی ئاڵمانیا، بە زمانی کوردی پێشکەش دەکرێت.

"مەم و زین" کە یەکێکە لە بەرهەمە گرنگ و بەنرخەکانی ئەدەبی کوردی، بە وەشانی ئۆپێراکەی لە فێستیڤاڵی نێودەوڵەتیی گوڵان لەبەردەم گوێگران و بینەران دەردەکەوێ.

میدیای ڕاین ڕۆژەکان دەژمێرێت بۆ پێشکەشکردنی "مەم و زین" (کە یەکێکە لە بەرهەمە ڕۆشنبیرییەکانی ئەدەبی کوردی) بە شێوەی ئۆپێرایەک بۆ هونەردۆستان. ئۆپێرای "مەم و زین" کە چەندین هونەرمەندی گرنگی وڵاتانی جیاواز لە یەک پڕۆژەدا کۆدەکاتەوە، بۆ یەکەمجار خۆی ئامادە دەکات بۆ ئەوەی لەبەردەم ئامادەبووان دەربکەوێت.

 ئۆپێرای مەم و زین بۆ یەکەمجار لە فێستیڤاڵی نێودەوڵەتیی گوڵان کە یەکێکە لە فێستیڤاڵە گرنگەکانی ڕۆشنبیری و هونەری جیهانی پێشکەش دەکرێت. مەم و زین کە بەرهەمی نووسەر و فەیلەسووفی کورد ئەحمەد خانییە، لە لایەن جەم ئیدیز و جومعە بۆینوکارە ئامادەکراوە و وەک ئۆپێرا نووسراوە. یەکەم جارە بەرهەمێکی کوردی وەک ئۆپێرا لەم ئاستەدا لە ڕێکخراوێکی وادا پێشکەش بکرێت و ئەمەش بۆ مێژووی ڕۆشنبیری و هونەری کوردی زۆر گرنگە.

فێستیڤاڵی نێودەوڵەتیی گوڵان کە لە ساڵی ١٩٨٧ەوە هەموو ساڵێک بەڕێوەدەچێت، لە چەندین چالاکیی ڕۆشنبیریدا لە سێ بەشی جیاوازدا نمایش دەکرێت کە پێکهاتوون لە مۆسیقا و شانۆ و سەما. فێستیڤاڵەکە کە ساڵانە پێشوازی لە 100 هەزار کەس دەکات، پاڵپشتیی هێزی ئەو ڕۆحی هونەرە دەکات کە یەکڕیزی بنیات دەنێت و هونەرمەندانی بەناوبانگی جیهانی لە ژێر یەک سەقفدا کۆدەکاتەوە.

ئەمساڵ فێستیڤاڵەکە میوانداریی ئۆپێرای مەم و زین دەکات کە لە دەرهێنانی ڕاین میدیا لە تورکیایە. "مەم و زین" یەکێکە لە بەرهەمە کولتوورییەکانی ئەدەبی کوردی، کە وەک داستانێکی دڵتەزێنی خۆشەویستی لە کۆتایی سەدەی ١٧دا نووسراوە و جێگەی خۆی لە میراتی کولتووری جیهاندا دەپارێزێت. داستانی "مەم و زین" لە چیرۆکێکی کلاسیکی خۆشەویستی تێدەپەڕێت و بە گێڕانەوەی شیعرییەوە تیشک دەخاتە سەر پێکهاتەی فیکری و مەعنەوی و کۆمەڵایەتی کورد.

ئەم بەرهەمە کە بە شێوەیەکی سەرنجڕاکێش ڕەنگدانەوەی بارودۆخی کۆمەڵایەتی و سیاسیی ئەو قۆناغەیە کە تێیدا نووسراوە، مانایەکی گرنگی هەیە؛ چونکە شاکارێکی کلاسیکە و هەروەها قووڵایی ماناییی زمانی کوردی و حەقیقەتی ئەدەبیاتێکی دەوڵەمەندیش دەهێنێتە دەرەوە. مەم و زین، بە هەستکردن و حەسرەت و دڵسۆزی لە ڕووی سەختی و ئاستەنگەکان لەبەردەم کولتووری فیۆداڵی و نادادپەروەرییەکان، بەرهەمی بەناوبانگی جیهانی "ڕۆمیۆ و جولیەت" بەبیر خەڵک دەهێنێتەوە.

ئەو کارە کە سەرچاوەیەکی گرنگی کولتووری کوردییە، تا ئێستاش کاریگەریی لەسەر جوگرافیا جیاوازەکانی جیهان بەردەوامە.

 کۆمپانیای ڕاین میدیا کە لەلایەن دەرهێنەران، دارا کوتلای و زەلال سیڤەر بەڕێوەدەبرێت، ماوەیەکی زۆرە ئۆپێرای مەم و زین ئامادە دەکات.

دەرهێنەری ئۆپێراکە بریتییە لە ئیحسان عوسمان، سۆپرانۆ ئۆزلەم بولوت، تێنۆر ئەنجێلۆ پۆلاک و پیانۆژەن فیۆنا پۆلاک، هەروەها چەندین هونەرمەندی دیکەش بەشدارن.

ئۆپێرای مەم و زین لە ١٣ی ئایاری ٢٠٢٣، کاتژمێر ٣:٠٠ی پاش نیوەڕۆ لە ویلایەتی هێسێی ئەڵمانیا پێشکەش دەکرێت.