شێرکۆ ژانزێم
کوردشۆپ- دوو کتێبی نوێی "حەلیم یوسف" لەلایەن چاپەمەنیی پەیوەندەوە چاپ و بڵاوکرانەوە.
یەکێک لەم کتێبانە بە ناوی "ئەو ئاگرەی بەربووەتە ماڵی ئێمە"، لە نووسراوە و وتارەکانی حەلیم یوسف پێکهاتووە.
ئەو ئاگرەی ئەم کتێبە باسی دەکات، ئاگری ئاسمیلەکردنە. حەلیم یوسف خۆی دەخاتە بەر ئەم ئاگرەی ڕۆژ بە ڕۆژ گەرمتر دەبێت و دەنووسێت. به م وتار و هه ڵوێست و نووسین و هەڵسەنگاندنانەی، تیشک دەخاته سەر بارودۆخی نووسین، چاپ، وەرگێڕان، ڕەخنه، سیاسەت و ڕۆشنبیری و هەروەها بە باس کردن لە نموونە و ئەزموونەکانی خۆی، پەوەندیی نێوان ئەدەبیات و کۆمەڵگا دەخاتە بەر چاو.
ئەو جگە لە خستنەڕووی زانیاریی زۆر لەسەر چالاکی و کەسایەتی و کتێب و ڕووداوەکانی بیست و پێنج ساڵی ڕابردوو، هەوڵ دەدات وێنەی ئەدەبی کوردی لە ڕوانگەی گشتیی ئەدەبی جیهانیدا دیاری بکات. ئەم کتێبە وەها گەشتێکە بە ناو بوارەکانی ئەدەبی کوردیی سەردەمی ئێمەدا، کە هەموو بەشداربووان، ئارەزووی دڵی خۆیانی تێدا دەبینێتەوە. لەبەر ئەوەی زمانێکی سەرگەرمکەر و ناوەڕۆکێکی ڕوون لەگەڵ یەک کۆبوونەتەوە، هەموو خوێنەرێک دەتوانێت بەشێک لەم گەشتە ناوازەیە بێت.
کتێبی دووەم بە ناوی "من کوڕی دوو هەزار و شەشسەد ساڵ تۆز و خۆڵم"، پێکهاتووە لە ٤٠ چاوپێکەوتن لەگەڵ حەلیم یوسف کە لە کات و بەرواری جیاوازدا ئەنجام دراون.
لەم چاوپێکەوتنانەدا کە لە ماوەی سی ساڵ چالاکیی نووسیندا لەگەڵی کراون، لە ڕێگەی چاوی نووسەرێکەوە (کە چ بە بەرهەمەکانی و چ بە بەشداریی تاکەکەسی لە بواری ڕۆشنبیری کوردیدا چالاک بووە)، مرۆڤ بە وردی هەڵسەنگاندنی گرنگترین ڕووداوە ئەدەبی و سیاسی و کۆمەڵایەتییەکانی بواری ڕۆشنبیریی کورد دێتە بەرچاوی.
خوێنەرانی ئەم کتێبە دەتوانن سەبارەت بە تێڕوانینی گشتی بۆ ئەدەبی کوردی، زانیاریی گرنگ وەربگرن. هەروەها دەتوانن هەموو وردەکارییەکانی ژیانی حەلیم یوسف و بەرهەمەکانی و بۆچوون و شرۆڤەکانی بزانن.
٤٠ چاوپێکەوتن، هەوڵدان بۆ کردنەوەی ٤٠ دەرگا و سەدان پەنجەرە لەبەردەم ئەدەبیاتی کوردیدایە. ئەدەبیاتێک کە لە نێو دیوارەکانی قەدەغەکردن و ستەم و جینۆسایددا گیری خواردووە.
