کوردشۆپ - ماست کە دەوڵەمەندە بە فسفۆر و کالسیۆم و ڤیتامینەکانی بی، خۆراکێکی زۆر سڵامەتە. مرۆڤ دەتوانێت لە ڕۆژێکدا زیاتر لە کوپێک ماست بخوا. ماست بە ناوەڕۆکی پرۆبایۆتیکەکەی هەرسکردن ئاسان دەکات. هەروەها وەک خۆراکی نێوان ژەمەکانیش دێتە ئەژمار.
سوودەکانی ماست
ئاوی ماست بۆ فڕێدانی دومەڵ و نەمانی کیست و فیرۆم کاریگەرە.
ماست باشترین پاڵپشت و بەهێزکەری بەرگریی جەستەیە.
هەرسکردن و سوڕی مانگانە ئاسان دەکات و یارمەتیی پاککردنەوەی ڕیخۆڵەکان دەدات.
لەبەر ئەوەی ڕێژەی لاکتۆزی کەمترە لە شیر، بۆ هەرسکردن بەسوودە.
بەهۆی ئەو پرۆبایۆتیکانەی تێیدایە، هەم بەرگریی لەش زیاد دەکات و هەم ڕێگا لە سکچوون دەگرێت.
ماست بەهۆی ئەو کالیسیۆمەی تێیدایە، ئێسکەکان بەهێز دەکا و دەیانپارێزێ. هەر بۆیە گرنگە کە بە خواردنی ماست ڕێگری لە پووکانەوەی ئێسک بکرێ. گرنگترین ئەرکی کالیسیۆم پاراستنی تەندروستیی ئێسک و ددانەکان و دڵنیابوون لە گەشەکردنیانە. بۆیە لە پرۆسەی گەشەکردنی خێرادا، هەروەها لە کاتی دووگیانی و شیرپێداندا، پێویستی بە کالیسیۆم، هێندەی تر زیاد دەکات.
ئاوی سەوزی سەر ماستەکە نابێ فڕێ بدرێ. ئەم ئاوە لە کاتی چالاکیی بەکتریاکانی ماستدا، ڤیتامینەکانی B1، B2،B3 پاڵاوتە دەکات. لەبەر ئەوەی ئەو ڤیتامینانە سوودێکی زۆریان بۆ تەندروستیی پێست هەیە و نابێ ئاوی کەسکی ماست بڕژێنرێ.
لەبەرئەوەی ماست ڤیتامین B لەخۆدەگرێت کە بە ڕیبۆفلاڤین پێناسە دەکرێت، ڕۆڵی وزە و میتابۆلیزم بۆ نوێبوونەوەی شانەکان دەگرێتە ئەستۆ.
پێكهاتەی ماست
ماست زۆر دەوڵەمەندە بە فسفۆر. فسفۆر بلۆکی سەرەکیی بنیاتنانی مۆلیکولەکانی DNA و RNA یە لە خانەکاندا.
لە ناو خانەکانی لەشدا دەبێتە هۆی دروست بوونی وزە و بڵاو بوونەوەی.
کوپێک ماستی سادە و کەم چەوری لە سەدا ٣٦ کاربۆهیدرات و لە سەدا ٣٢ پرۆتین و لە سەدا ٣٢ چەوریی تێدایە.
لە کوپێک ماستدا ١٠٠ کالۆری هەیە.
ڤیتامین و کانزاکانی ناو ماست
6.8 پرۆتین
3.5 چەوری
8.2 کاربۆهیدرات
100 میلیگرام سۆدیۆم
320 میلیگرام پۆتاسیۆم
230 میلیگرام کالیسیۆم
200 میلیگرام فسفۆر
10 میلیگرام کۆلسترۆڵ
44 ڤیتامین A
2 میلیگرام ڤیتامین سی
چۆن دەبێت ماست بەکاربهێنرێت؟
مرۆڤ دەتوانێ ڕۆژانە ماست بخوات و سوودی زۆری هەیە. دەتوانی لە نێوان ژەمەکاندا ماست بخۆی. هەروەها ڕۆژانە بەلایەنی کەمەوە یەک کوپ ماست بخۆ.
ئەو ماستەی پێویستە ڕۆژانە بخورێ، دەکرێ بەپێی بەرهەمە شیرەمەنییەکانی تریش حیساب بکرێ و بە گوێرەی ئەوە بخورێ. بەڵام ئەگەر کەسێک بەرهەمی شیرەمەنیی تر نەخوا، ئەوا بەپێی پێویستیی جەستەی، دەکرێ بڕی ماستی ڕۆژانەی زیاد بکرێ. ئەگەر کەسێک لە ماوەی ڕۆژدا شیر و پەنیر بخوا، لەو ڕۆژەدا یەک کوپ ماستی بەسە؛ ئەگەریش هیچ بەرهەمێکی شیرەمەنیی تر نەخوا، ئەوا پێویستە ڕۆژانە ٣ بۆ ٤ کوپ ماست بخوا.
هەندێک ماست کە لە ماڵەوە دروست ناکرێن و بەرهەمی کارگەکانن، شەکر و هەندێک مادەی بێسوودیان تێدایە، بۆیە پێویستە سەبارەت بەم بابەتە بە وشیارییەوە بجووڵێنەوە و باشتر وایە ئەو ماستانەی بە شێوەیەکی سروشتی دروست دەکرێن هەڵبژێرین.
