- ڕۆژ قادری
شاهۆ محەممەدی، مەلەوانی خاوەن پێداویستیی تایبەت کە "سەندرۆمی داون"ی هەیە و خەڵکی شاری مهابادی ڕۆژهەڵاتی کوردستانە، ڕێکۆردێکی جیهانیی تۆمار کرد و میداڵیای زێڕی ئۆلەمپیادی تایبەتی بێرلینی بەدەست هێنا.
شاهۆ محەممەدی، مەلەوانی "سەندرۆمی داون"ی خەڵکی مهاباد، لە پارائۆلەمپیکی بێرلین بۆ ساڵی ٢٠٢٣ لە ئاڵمان، لە چوارچێوەی تیمی نیشتمانیی ئێران بەشدار بوو و بە ورە و هێزێکی بێ وێنەوە دەستی بە پێشبڕکێکانی کرد و خولێکی تەواو لە پێش ڕکابەرەکانییەوە بوو.
لە کۆتاییدا ناوبراو بە تۆمارکردنی ڕێکۆردی مێژوویی ٧ خولەک و ٤٦ چرکە، میداڵیای زێڕی بەدەست هێنا و ئەگەری زۆرە ناوی شاهۆ محەممەدی دوای ئەوەی لە تەمەنی ١٧ ساڵیدا میداڵی زێڕی ئۆلەمپیادی تایبەتی بەدەست هێناوە، لە کتێبی "گینس" تۆمار بکرێت.
کەیوان خۆشبەخت، سەرۆکی ئیدارەی وەرزش و لاوانی مهاباد، لە وتووێژ لەگەڵ میدیا نێوخۆییەکانی ئێران، لە پێوەندی لەگەڵ شاهۆ محەممەدی، ڕایگەیاند: شاهۆ محەممەدی لەگەڵ تیمی میللیی ئێران، لە کێبڕکێیە جیهانییەکانی پارائۆلەمپیکی ٢٠٢٣ کە لە دە ڕۆژی کۆتایی مانگی جۆزەردانی ئەمساڵ لە ئاڵمان بەڕێوە چوو، بەشداریی کردووە. شاهۆ تەنیا نوێنەری کاروانی ئێران لەم ئۆلەمپیکە لە بواری مەلەکردن بوو.
سەرۆکی ئیدارەی وەرزش و لاوانی مهاباد، زیادیشی کرد: شاهۆ محەممەدی، وەرزشکاری سەندرۆمی داون، ڕێکۆردی مەلەکردنی کەمئەندامان، میداڵیای زێڕ و زیوی ئۆلەمپیکی تایبەتی ئێرانییەکان، زێڕی کێبڕکێی پاڵەوانیەتیی مەلەکردنی کەمئەندامانی ئێران و چەندین مەقامی بەنرخی تری لە کارنامەی وەرزشیی خۆیدا هەیە. شاهۆ لە بوارەکانی بەلەمەوانی، شاخەوانی، باسکیل لێخوڕینیش چالاکە.
شاهۆ محەممەدی لە شاری مهاباد بە "فریشتەی قارەمان" ناوبانگی دەرکردووە. هەروەها لە کاتی بەڕێ کەوتن بۆ ئاڵمان بۆ بەشداری لەو کێبڕکێیە جیهانییە، لەلایەن خەڵکی وەرزشدۆستی مهابادەوە بە ڕێز و گڕوتینێکی تایبەتەوە بەڕێ کرا.
شاهۆ محەممەدی کێیە؟
شاهو محەممەدی تەمەن ١٧ ساڵ، خەڵکی شاری مهابادی ڕۆژهەڵاتی کوردستانە. ناوبراو لە تەمەنی ٦ ساڵییەوە بە شێوەیەکی پڕۆفیشناڵ دەستی بە مەلەکردن کردووە و ئێستا لە شاری مهاباد بە "فریشتەی قارەمان" ناوبانگی دەرکردووە.
شاهۆ محەممەدی لەدایکبووی ١٣ی خەرمانانی ١٣٨٤ی هەتاوییە (٢٠٠٥ی زایینی). ناوبراو تووشی سەندرۆمی داونە و کاتی خۆی بەپێی ڕاسپاردەی پزیشکەکانی، دایک و باوکی هەوڵیان داوە کێشەی فۆبیای ئەو لە ئاو، لە ڕێگای مەلەکردنەوە دەرمان بکەن و ئێستا ئەو لە بواری مەلەکردنەوە بە هەڵکەوتەیەکی جیهانی دەناسرێت.
شاهۆ لە ساڵی ٢٠١٤ەوە بە سەرپرشتیی "موحسین مازوچی"، مەلەوان و ڕاهێنەری مهابادی، هاتووەتە نێو ئەم بوارەوە. ساڵی ٩٧ی هەتاوی توانیی بە پێوانی ٢ هەزار و ٥٠٠ مەتر بە مەلەکردن، لە ئاستی ئێران و جیهاندا ڕێکۆردێکی نوێ تۆمار بکات. ناوبراو توانی لە ماوەی یەک کاتژمێردا، مەودایەکی ٢ هەزار و ٤٨٣ مەتری لە ٤٩ جاردا (بە شێوە چوون و گەڕانەوە) بە مەلەکردن بپێوێت و بوو بە یەکەم کەسێک کە لە بەشی خاوەن پێداویستییە تایبەتەکانی ئێران و جیهان توانیویەتی زۆرترین مەودای مەلەکردنی خۆڕاگری لە ماوەی یەک کاتژمێردا بپێوێت.
شاهۆ محەممەدی، ئەندامی تایبەتی پارائۆلەمپیکی ئێران و خاوەن دوو قارەمانی لە کێبڕکێی سینگەمەلەی ئێرانە، ناوبراو یەکەمین بەلەمەوانی سەندرۆمیی ئێران و یەکەمین سەندرۆمی داونیی خاوەن توانای کۆنترۆڵکردنی بەلەمی کایەک لە ئێرانە و لەم بوارەشدا توانیویەتی دوو میدیاڵیای زێڕ بەدەست بهێنێت. شاهۆ تەنیا سەندرۆم داونێکە لە جیهاندا کە دەتوانێت لەگەڵ مەلەوانە ئاساییەکان پێشبڕکێ بکات.
شاهۆ هاوکات لەگەڵ مەلەکردن و بەلەمەوانی، حەزێکی زۆری لە یاریی ئاسن و شاخەوانیشە، بۆیە بەردەوام سەردانی هۆڵی لەشجوانی دەکات و بۆ شاخەوانییش سەردانی چیا و شاخەکانی مهاباد و کوردستان دەکات.
شاهۆ محەممەدی، ساڵی ٢٠٢١ی زایینی، لەلایەن پێگەی هەواڵیی "هاژە" لە مهاباد، وەک شارۆمەندی شیاوی مهابادی ناسێندرا و ڕێزی لێ گیرا.
