ڕۆژان سۆفیزادە
مامۆستا ڕۆڵێکی گرینگی لە وانەگوتنەوەدا هەیە، چونکە ئەو جێبەجێکاری سەرەکیی بەرنامەی خوێندنە، ئەو لە پرۆسەی فێربوون و وانەگوتنەوەدا ڕێبەری خوێندکارانە، ئەو چاودێریی ئەنجامی خوێندکاران دەکات و هەوڵی پێشخستنیان دەدات. هەروەها لەسەر کەسایەتیی قوتابییان کاریگەریی هەیە، چونکە ڕاستەوخۆ خەریکی کارەکانی دەبێت و کاتێکی زۆریان لەگەڵدا بەسەر دەبات.
بۆ نموونە بۆ ماوەیەک لە ئەڵمانیا پزیشکەکان داوای زیادکردنی مووچەیان دەکرد، بەڵام سەدرئەعزەمی ئەڵمانیا (ئانجێلا مێرکێل) وڵامی ئەو داواکارییەی دایەوە و گوتی: "چۆن داوای ئەوە دەکەن کە مووچەکانتان لە مووچەی مامۆستایان زیاتر بێت، لە حاڵێکدا هەر ئەوان بوون کە ئێوەیان گەیاندە ئەم قۆناغە."
بەڵێ لێرەدا ڕۆڵی گرینگی مامۆستا دەبینین و دەزانین چەندە ڕۆڵی مامۆستا بۆ گەشەپێدانی نیشتمان و گەیشتنی هەر تاکێک بە هیوا و ئامانجەکانی، گرینگە.
مامۆستا بەردی بناغەی پڕۆسەی پەروەردەیە و ڕۆڵێکی سەرەکی و کارایان لە قۆناغەکانی ژیان بۆ تێگەیشتن و پەروەردەکردنی مرۆڤ بە گشتی هەیە، چونکە ئەوە مامۆستایە کە دەتوانێت بە باشترین شێوە خوێندکار لە هەموو بوارەکانی گەشەپێدان و تەندروستی و خۆشەویستی ئامادە بکات.
ڕۆڵی مامۆستایان ئەوەیە کە خوێندکاران بە شێوەیەکی تەندروست و دروست پەروەردە بکرێن، بۆ ئەوەی بتوانن ببنە تاکێکی دڵسۆز، چالاک و بەویژدان بۆ وڵات، نەتەوە و کۆمەڵگەکەیان.
لەبەر ئەوەی مامۆستا بە ئاسانی دەتوانێت کاریگەریی ئەرێنی لەسەر ژیانی خوێندکارەکانی دابنێت، هەروەها سروشتی مرۆڤ پێویستی بەوەیە کەسێک ببێتە ڕێنوێنی و سەرچاوەی هەستە زیندووەکانیان و بەرەو کردارێکی باش و باشتریان ببات.
وانەگوتنەوە تەنیا گەیاندنی زانیاری و گفتوگۆکردن لەسەر بابەتەکان بۆ قوتابییان نییە، بەڵکوو مامەڵەکردنە لەگەڵ قوتابییان، وەک باوک، دایک، برا و خوشک. مامۆستا بۆ خوێندکاران ڕێبەر و یارمەتیدەرە، لەگەڵیان دەژی، پەروەردەیان دەکات، سەرپەرشتی و چاودێریی ڕەفتاریان دەکات.
مامۆستا خوێندکارانی فێری خوێندنەوە، نووسین و قسەکردن دەکات، هەتا لە داهاتوودا ببنە مامۆستا، پزیشک، ئەندازیار و دادوەر و هتد.
هەر مامۆستایەک لە ئەنجامە گشتییەکان بەرپرسیارە، چونکە مامۆستا لە بواری پەروەردە و وانەگوتنەوەدا پێشەنگە. مامۆستا لە هەموو ئاستەکانی خوێندکار، ڕەفتار و ئەنجامەکانیان بەرپرسیارە، چونکە دەتوانن ڕۆڵی ئەرێنیی خۆیان بگێڕن و خوێندکار بە ئامانجەکانی بگەیەنێت. لە ڕاستیدا ئەمەیە کە کۆمەڵگە چاوەڕوانیی لە مامۆستایانی دڵسۆز هەیە.
پێویستە ڕوانگە و پەیامی هەر مامۆستا و قوتابخانەیەک بەم شێوەیە بێت:
- پەروەردەکردنی قوتابییان و بەرزکردنەوەی کوالێتیی خوێندن و بەرزکردنەوەی ئاستی زانستیی قوتابییان بە شێوەیەکی داهێنەرانە.
- فێرکردنی قوتابییان بۆ پاراستنی ژینگە و گرنگیدان بە پاراستنی ژینگە و پاک‌وخاوێنیی قوتابخانە.
- جەختکردنەوە لەسەر پەرەپێدانی توانای پیشەییی مامۆستایان و بەرزکردنەوەی کوالێتیی فێربوون.
- جەختکردنەوە لەسەر پەروەردەی خوێندکاران و لێکدانەوەی بەها و ڕەفتارە کۆمەڵایەتییەکان و ڕەنگدانەوەیان لە ڕەفتاری قوتابییاندا.
- دابینکردنی کەشێکی خۆش و یەکسان بۆ قوتابییان.
- گرینگیدان بە تەندروستیی کەسانی نێو قوتابخانە.
- ئاگادارکردنەوەی دایک و باوکی قوتابییان لە پرسە پەیوەندیدارەکان.
- بنیاتنانی نەوەیەکی پڕ لە هەست و خۆشەویستی بۆ نیشتمانەکەیان.
