شادی
کوردشۆپ - گیا یان سەوزیی سیابۆ کە هەم بە کاڵ و هەم بە کوڵاو بەکار دێت، بە دەرمانی هەموو دەردێک ناسراوە و لە ناوچە بەرز و بەفراوییەکان شین دەبێت و بۆ ئازارشکێنیی پێوەدانی مار و دەرمانی نەخۆشییەکانی ڕۆماتیزم، دڵەکزێ و شەکرەش بەسوودە.
ئەم گیایە بەسوودە، بەڵام لە هەمان کاتدا کۆکردنەوەیشی زۆر زەحمەتە.
گیای سیابۆ کە بە کاڵی یان بە کوڵاوی دەخورێت، دەتوانرێت بە چەندین شێوەی تریش بەکار بهێنرێت و سوودێکی زۆریشی هەیە. ئەم گیایە کە زیاتر لە دروستکردنی پەنیردا بەکار دێت، جۆرێک "پنجار"ە و لە هەندێک شوێنیش پێی دەڵێن "پانجار".
گیای سیابۆ لە پارێزگای جۆلەمێرگ و ناوچەکانی بۆتان و لە هەندێک شوێنی ناوچەی سەرهاتی باکووری کوردستان و هەندێک شوێنی ڕۆژهەڵاتی کوردستان دەڕوێت و خاوەن پێکهاتەگەلێکی زۆر بەسوودە بۆ تەندروستیی مرۆڤ.
گیای سیابۆ کە بە گیایەکی ڕەسەن و خۆجێیی ناسراوە و زیاتر لە ناوچەی جۆلەمێرگ شین دەبێت، تایبەتمەندییەکی دژەژەهری هەیە، هەروەها بۆ هاوسەنگکردنی فشار و زەخت زۆر بەسوودە.
ئەم گیایە بۆ چارەسەرکردنی پێوەدانی ئاژەڵە ژەهراوییەکان بەسوودە، هەروەها ڕێگری لەوە دەکات کە ژەهر زیان بە لەش بگەیەنێت.
هەروەها ئەم گیایە بۆ پاراستنی تەندروستیی ڕیخۆڵەکان زۆر باشە، هاوکات بۆ نەخۆشییەکانی سینگ و تێکچوونی ئێسک و سەرئێشە، زۆر کاریگەرە.
گیای سیابۆ چۆن دەکوڵێنرێت؟
ئەم گیایە کاتێک کۆ دەکرێتەوە و تازەیە، دەتوانرێت بە کوڵاوی بەکار بهێنرێت. هەروەها لە زستاندا وەک شۆربا دروست دەکرێت و دەخورێت، هەروەها لە ڕۆنیشدا سوور دەکرێتەوە و دەخورێت.
ئەو خواردنانەی بە سیابۆ دروست دەکرێن هەم زۆر بەتامن و هەم زۆر بەسوودن. ئەم گیایە کە سەرچاوەیەکی گرینگی خۆراکە، بۆ زاڵبوون بەسەر زۆرێک لە نەخۆشییەکانیشدا بەکار دێت. هەروەها دەتوانرێت لە زەڵاتەدا بەکار بهێنرێت و پێویستە پێش بەکارهێنان، بەباشی بشۆردرێت.
سیابۆ چۆن بەکار دێت؟
ئەم گیایە بە گشتی، گەڵاکەی، ڕەگ و قەدەکەی بەکار دێت.
هەرچەندە خەڵکی ناوچەکە زۆرجار ئەم گیایە لە دروستکردنی پەنیردا بەکار دەهێنن، بەڵام بۆ شتی تریش بەکار دەهێنرێت.
ئەگەر ژنان کێشەی سووڕی مانگانەیان هەبوو، دەتوانن ئەم گیایە بەکار بهێنن. هەروەها سیابۆ بۆ باشتر کارکردنی ڕیخۆڵەکانیش بەسوودە.
لە حاڵەتەکانی وەک پێوەدانی مار و دووپشک دەتوانرێت وەک دژەژەهر بەکار بهێنرێت و دەتوانرێت لە شوێنی پێوەدانەکە بدرێت، هەروەها ئەگەر لەو کاتەشدا بخورێت، زۆر باشە.
