کوردشۆپ- گوڵی هێرۆ بە ناوی زانستیی "Alcea rosea" دەناسرێت. ئەم گوڵە لە کەناری ڕێگاکان و لە کێڵگەکاندا دەڕوێت و بۆ زۆرێک لە نەخۆشییەکانی وەک هەڵامەت و ئانفۆڵانزا بەکار دێت. گوڵی هێرۆ بە سەرچاوەی چاکبوونەوە بۆ زۆرێک لە نەخۆشییەکان ناسراوە، هەروەها لە پیشەسازیی دەرمان و جوانکاریدا بەکار دێت.
گوڵی هێرۆ تا ٢ مەتر و نیو باڵا دەکات، ڕەنگەکانی پەمەیی، سپی، وەنەوش و زەردن. هەروەها لەو ناوچانەی کە زریانیان تێدا نییە، باشتر گەشە دەکەن. ئەم گوڵە حەزی لە خاکی بەهێز و گڵینە.
گوڵەکانی گوڵی هێرۆ لە مانگەکانی تەمموز و ئابدا کۆ دەکرێنەوە و ڕەگەکانیشی لە پاییزدا کۆ دەکرێنەوە و وشک دەکرێنەوە.
گەڵا و گوڵ و ڕەگی ئەم گوڵە دەرمانییە. نشاستە، ساکارۆز، گالاکتۆز، پێکتین، چەوری، تانین و ئەسپاراجینی تێدایە.
لە درێژایی مێژوودا لە ڕەگ و گەڵاکانی گوڵی هێرۆ لە بواری پزیشکی و دەرمانیدا کەڵک وەرگیراوە.
سوودەکانی گوڵی هێرۆ:
ئەم گیا دەرمانییە کە سەدان ساڵە لە گیراوەی دەرمانیی جۆراوجۆردا بەکار هاتووە، لە دژی زۆرێک لە کێشە تەندروستییەکان بەکار دەهێنرێت. بەتایبەت لە مانگەکانی زستاندا سوودێکی زۆری هەیە و بۆ دەرمانی کۆکەی وشک زۆر کاریگەرە.
سوودەکانی تری گوڵی هێرۆ بریتین لە:
١- ئەم گوڵە بۆ زۆرێک لە نەخۆشییەکانی گەدە بەسوودە.
٢- یەکێک لە بەکارهێنانە باوەکانی گوڵی هێرۆ ئەوەیە کە وەکوو ئازارشکێن بەکار دێت. بە تایبەتی گەڵاکانی کاریگەریی کەمکردنەوەی ئازاریان هەیە.
٣- گوڵی هێرۆ کە هاوکات کاریگەریی هێورکەرەوەی هەیە، بەهۆی ئەو زەیتە سروشتییانەی کە تێیدایە، کاتێک وەک چای دەخورێتەوە، کاریگەرترە. هەروەها بۆ ئەو کەسانەی کێشەی خەوتنیان هەیە، بەسوودە.
٤- گوڵی هێرۆ یارمەتیدەرە بۆ ئەوەی مرۆڤ تەندروست بمێنێتەوە. هەروەها سیستەمی بەرگریی لەش لە دژی نەخۆشییەکان بەهێز دەکات.
٥- ئەم گیایە بۆ دەرمانی هەوکردنی گورچیلە باشە، هەروەها کێشەکانی میزکردن چارەسەر دەکات.
٦- گوڵی هێرۆ کاریگەریی زۆری لەسەر چارەسەرکردنی هەوکردن هەیە و بۆ زاڵبوون بەسەر هەوکردنی پرۆستات و هەوکردنی گەدە و ڕیخۆڵەکان، زۆر باشە.
٧- ئەم گوڵە ڕێگری لە ناڕەحەتییەکانی کۆئەندامی سووڕی مانگانە دەکات.
٨- ئازارشکێنێکی سروشتییە و بۆ وشککردنەوەی هەوکردنەکان زۆر کاریگەرە.
٩- ئەگەر بە بەردەوامی بەکار بهێنرێت، پێست نەرم دەکاتەوە و ڕێگەی پێ دەدات خۆی نوێ بکاتەوە.
١٠- شۆردنی قژ بە ئاوی گوڵی هێرۆ، قژ دەدرەوشێنێتەوە و دەیگەیەنێتە ئاستێکی زیندوو.
١١- کێشەکانی زەخت و دڵەڕاوکێ و کەم‌خەوی لەنێو دەبات.
١٢- کاتێک وەکوو غەرغەرە بەکار دێت، بۆ چارەسەرکردنی کێشەکانی ددان و پووک بەسوودە.
١٣- ئەگەر بە بەردەوامی بەکار بهێنرێت، بەرگری لە جەستەدا زیاد دەکات.
١٤- ئه‌گه‌ر ئه‌و دایکانه‌ی شیری خۆیان به منداڵه‌کانیان دەدەن به شێوه‌یه‌کی بەرده‌وام به‌کاری بهێنن، شیریان زیاد ده‌بێت و بەرگریی منداڵەکەیان به‌هێز دەبێت.
١٥- بۆ زاڵبوون بەسەر ئازارەکانی خانمان لە کاتی سووڕی مانگانەدا، زۆر کاریگەرە.
١٦- زەیتی گوڵی هێرۆ بۆ لابردنی پەڵە و چرچ و لۆچ، کاریگەرە.
سوودە کەمتر زانراوەکانی گوڵی هێرۆ:
١- ئەو کەسانەی کە دەمارەکانیان گیراوە، دەتوانن لە چای گوڵی هێرۆ کەڵک وەربگرن.
٢- ئەگەر ڕۆژانە یەک فنجان چای هێرۆ بخورێتەوە، ئەگەری تووشبوون بە نەخۆشیی ئالزایمر (نەخۆشیی لەبیرچوونەوە) کەم دەبێتەوە.
٣- گوڵی هێرۆ بۆ ماوەی ڕۆژێک لەناو ئاوی سارددا بەجێ بهێڵە و دەموچاوتی پێ بشۆ؛ هێڵەکانی پیربوون لەسەر دەموچاوت نامێنن.
٤- گوڵی هێرۆ بخەرە نێو ئاوی گەرمەوە، گوڵەکانی ورد بکە و بۆ چارەسەرکردنی برینەکانی دەموچاوت بەکاری بهێنە.
٥- ئەم گوڵە بۆ نەهێشتنی ئازاری جومگەکان سوودی هەیە.
