شادی 

دوکتور ئانیل ساریجا، پسپۆڕی بەشی دڵ و دەمارەکانی زانکۆی "دوکتور سوات گونسەل" ڕایگەیاند خواردنەوەی قاوە کێشەی دەمار و خوێنبەرەکان بە ڕادەیەکی زۆر کەم دەکاتەوە.

بە گوتەی ئەو پسپۆڕە، قاوە یەکێک لەو خواردنەوانەیە کە ئێمە ڕۆژانە دەیخۆینەوە و پارێزەرێکی باشی دڵی ئێمەیە؛ بەڵام بە شێوەیەکی دروست کەڵکی لێ وەرناگرین و ناشتوانین وازی لێ بێنین. ئاماژەی بەوەش کرد: "قاوە دەتوانێ ڕێگا لە هێندێک لە نەخۆشییەکانی دەمارەکان و خوێنبەرەکان بگرێ و مەترسییەکانی سەر دەمارەکان بە ڕادەیەکی زۆر کەم کاتەوە.

دوکتور ساریجا بە ئاماژەکردن بەوەی ڕادەیەکی زۆر ئانتی ئۆکسیدان لە ناو قاوەدا هەیە کە کاریگەریی ئەرێنیی لەسەر تەندروستیی مرۆڤ دەبێ جەختی کردەوە: سەرەڕای ئەمانەش ڕادەی بەکارهێنان و چۆنێتیی خواردنەوەی قاوە دەتوانێ ئەم خواردنەوەیە لە جێی شتێکی بەسوود بکاتە خواردنەوەیەکی زیانبەخش.

ڕۆژانە دوو کوپ قاوە بخۆنەوە

دوکتور ئانیل ئاماژەی بەوە کرد خواردنەوەی ڕۆژانەی 2 تا چوار کوپ قاوە لە ڕۆژدا خواردنەوەیەکی سووکە و ئەگەر لە 6 کوپ زیاتر بێ ئەوا دەبێتە خواردنەوەی قورس. ئەم پسپۆڕە بە ئاماژە کردن بەوەی خواردنەوەی 2 تا چوار کوپ قاوە لە ڕۆژدا بەسوودە گوتیشی: یەکێک لەو پرسیارانەی بەردەوام ڕووبەڕووی پسپۆڕانی دڵ و دەمار دەبێتەوە ئەوەیە کاریگەریی قاوە لەسەر تەندروستیی مرۆڤ چییە؟ وڵام ئەوەیە: بە هۆی هەبوونی زیاتر لە 1000 پێکهاتەی بایۆلۆژی لە قاوەدا، خواردنەوەی 2 تا 4 کوپ قاوە لە ڕۆژدا بۆ دڵ بەسوودە.

دوکتور ئانیل بە ئاماژەکردن بەوەی بە درێژاییی مێژوو قاوە بۆ ساڕێژ بوونەوەی برینەکان و دەرمانی سکچوون و نەخۆشیگەلی وەک رۆماتیسمی دل و بەردی گورچیلە بەکارهاتووە گوتیشی: هێندێک لەو پێکهاتانەی لە قاوەدا هەن دەبنە هۆی بەرین بوونەوەی دەمارەکان و خوێنبەرەکان هەر بۆیەش قاوە دەتوانێ ئەو نەخۆشییانەی دەمار و دڵ کە دەبنە هۆی جەڵتەی دڵ و جەڵتەی مێشک کەم کاتەوە. بەڵام بە دیاریکراوی 4 تا 5 کوپ قاوە لە ڕۆژدا 500 میلی گڕەم کافئینی تێدایە و ئەمەش لە دژی ئەو هۆکارانەی کێشە بۆ دڵ و دەمارە خوێنبەرەکان ساز دەکەن دەجووڵێتەوە و کاریگەریی ئەرێنیی لەسەر دۆخی تەندروستیی دڵ و دەمارەکان دەبێ.

زۆر خواردنەوەی قاوە زیانی هەیە

دوکتور ساریجا سەبارەت بە خواردنەوەی لەڕادەبەدەری قاوە کە کاریگەری لەسەر دڵ و دەمارەکان دادەنێ هۆشداریی دا و لەمەڕ ڕادەی ئەو قاوەیەی بۆ خواردنەوە ڕێگەپێدراوە گوتی: بە لەبەرچاوگرتنی ژێنێتیکە جیاوازەکان، پێویستە خواردنی ڕۆژانەی کافئین لە 300 میلیگڕەم تا 400 میلیگڕەم زیاتر نەبێ.