شادی
کوردشۆپ- "موراد ئۆزاراس" شوانێکی تەمەن ٢٩ ساڵە و خەڵکی شارۆچکەی گەڤەری سەر بە شاری جۆلەمێرگ لە باکووری کوردستان، ئۆتۆمبێلێکی لە وردەواڵە و کەرەسەی فڕێدراو دروست کردووە کە دەتوانێت تا ٥٠ کیلۆمەتر لە کاتژمێرێکدا ببڕێت.
موراد ئۆزاراس کە لە گوندی "هەلەییس" لە گەڤەر نشتەجێیە، پاشماوەی کەلوپەلی فڕێدراو و کەرەستەی دەستی دووی لە ماڵەکەی خۆی کۆکردووەتەوە و بۆ دروستکردنی ئەم ئوتۆمبێلە بەکاری هێناون.
ئوزاراس لە لایەک شوانێتیی دەکرد، لە لایەکی دیکەوە بە مەبەستی دروست کردنی ئەو ئامێرەی لە خەیاڵیدا بوو دەستی کرد بە کۆکردنەوەی پارچە و کەلوپەلی فڕێدراو و پاشان دەست بەکار بوو.
ئەو گەنجە کە هەمووان پێکەنینیان پێی دەهات و دەیانگوت ناتوانێ ئەم کارە بکات، لە ئەنجامی ٣ مانگ کارەکەیدا، ئۆتۆمبێلێکی دروست کردووە و دواتر سواری ئۆتۆمبێلەکەی بووە و لە گوندەکەی خۆیدا تاقیی کردووتەوە.
ئۆزاراس ڕوونی کردەوە، بۆ جووڵە بەرەو پێشەوە و دواوە ئۆتۆمبێلەکە توانایەکی زۆر باشی هەیە و گوتیشی: "تەنانەت لە منداڵیشدا ئەم توانایەم هەبوو، بەڵام بۆ پەرەپێدانی ئەم کارە پێویستم بە سەرمایە بوو. چونکە پارەم نەبوو، نەمدەتوانی هیچ بکەم. لە کۆتاییدا بڕیارم دا ئەم کارە بکەم. لە سەرەتادا هەمووان دەیانگوت ناتوانی دروستی بکەیت، بەڵام من باوەڕم بەخۆم هەبوو و دروستم کرد. سوپاسی باوکم دەکەم کە لەم بابەتەدا هاوکاری و پشتیوانیی کردم."
بە گوتەی "ئۆزاراس" ئۆتۆمبێلەکە دەتوانێت خێراییەکەی بگاتە ٥٠ کیلۆمەتر لە یەک کاتژمێردا و دەشڵێت: "لە منداڵییەوە حەزم لەم کارانە بووە، بابەتێک بوو هەمیشە سەرنجی ڕادەکێشام. هێندێک کەس هەرچەند دەهاتن و دەیاندیت خەریکی دروستکردنیم، دەیانگوت تۆ ناتوانی. منیش شوانێتیم دەکرد و لە کاتی بەتاڵی خۆمدا دەستم کرد بە دروستکردنی ئۆتۆمبێل. ئەگەر دەرفەتم هەبوایە شتگەلێکی باشترم دروست دەکرد. من حەز و ویستی زۆر جیاوازم هەیە و بۆ گەیشتن بە حەزەکانم ئەوەی لە دەستم بێ دەیکەم. بەڵام لەبەر ئەوەی سەرمایەم نییە، هەر ئێستاش کە ئەم شتانە دروست دەکەم، چاوەڕێی پاڵپشتیی دامەزراوە پەیوەندیدارەکانم. ئەگەر دەرفەتم پێ بدرێت، شتی جوانتر و باشتر دروست دەکەم."
