-کوردشۆپ

بەیانیی ڕۆژی پێنجشەممە 27ی بەفرانباری 2724ی کوردی (18/01/2024)، تەرمی سێ شاخەوانی کوردی خەڵکی نەغەدە کە ڕۆژی هەینیی ڕابردوو لە ناوچەی شنۆ کەوتبوونە ژێر هەرەس، بە خاک سپێردرا. بە پێی خەمڵاندنی چالاکانی بەشدار لە ڕێوڕەسمەکەدا، زیاتر لە چل هەزار هاووڵاتیی کورد لە بەخاکسپاردنی ئەم شاخەوانانەدا بەشدار بوون.

بەرەبەیانی ڕۆژی هەینیی ئەم حەفتەیە، تیمی شاخەوانیی کاویانی نەغەدە کە لە پێنج کەس پێکهاتبوون، لە داوێنی چیای ڕندۆڵە لە پشت گوندی زمێی سەر بە شاری شنۆ کەوتنە بەر هەرەس. یەکێک لە شاخەوانەکان کە توانیبووی خۆی ڕزگار بکات تیمەکانی فریاکەوتنی ئاگادار کردەوە و هەر ئەو ڕۆژە بە هەوڵی شاخەوانانی ناوچەکە و تیمەکانی مانگی سووری شنۆ، یەکێکی دیکە لە شاخەوانەکانیش ڕزگار کرا. بەڵام سێ کەس لە شاخەوانەکان بە ناوەکانی محەممەد ڕۆیان، موحسین عەزیزی و ڕەزا کایشی، کە کەوتبوونە ژێر هەرەسەکە تا ڕۆژی چوارشەممە نەدۆزرانەوە.لە ماوەی ئەو شەش ڕۆژەدا سەدان کەس لە شاخەوانانی ڕۆژهەڵاتی کوردستان و خەڵکی گوندەکانی زمێ و ئاڵکاوێ لەگەڵ هاووڵاتیانی شارەکانی شنۆ و نەغەدە لە هەڵمەتی گەڕان و پشکنین بە دوای ئەم سێ شاخەوانەدا بەشدار بوون.

لەم ماوەیەدا خەڵکی گوندی زمێ و هاووڵاتیانی شاری شنۆ، جیا لە بەشداریی چالاکانەیان لە گەڕان بە شوێن شاخەوانەکاندا، بە دابینکردنی خۆراک و پێداویستییەکانی دیکە بۆ تیمەکانی گەڕان و پشکنین و هەروەها بە دابینکردنی ئامێرەکانی گواستنەوەی تیمەکان، ڕۆڵێکی سەرەکییان لەم هەڵمەتی گەڕان  وپشکنینەدا گێڕا.

بەڵام بە داخەوە بەردەوام بوونی بەفربارین لە لایەن و باهۆز و باڕن لەسەر چیای ڕندۆڵە و ئەو دۆڵەی شاخەوانەکان لێی بزر ببوون بوو بە هۆی ئەوەی هەوڵەکان بێ دەسکەوت بمێننەوە.خراپیی کەشوهەوا بە ڕادەیەک بوو کە مەترسیی دووبارە هەرەسهێنانی بەفر لەئارادا بوو و شاخەوانان هۆشدارییان بە خەڵکی خۆبەخش دا بە بێ کەلوپەلی پێویستی شاخەوانی و ڕەچاوکردنی ڕێکارەکانی خۆپارێزی ڕوو لە ناوچەکە نەکەن.

لە ئێوارەی ڕۆژی دووشەممەوە هێزەکانی مانگی سوور بە هۆی خراپیی کەشوهەواوە گەڕانەوە بۆ گوندی زمێ و رایانگەیاند تا باشتربوونی کەشوهەوا و تەواو بوونی بەفر و باڕن ناگەڕێنەوە ناوچەکە. بەڵام شاخەوانانی کورد و خەڵکی ناوچەکە لە گەڕان بە دوای سێ شاخەوانە ونبووەکەدا هەر بەردەوام بوون و سەرئەنجام ڕۆژی چوارشەممە بە هەوڵی ئەو تیمانە تەرمی هەر سێ شاخەوانەکە دۆزرایەوە.

بەرەبەیانی ڕۆژی پێنجشەممەش بە بەشداریی دەیان هەزار کەس لە خەڵکی ڕۆژهەڵاتی کوردستان، تەرمی ئەو سێ شاخەوانە لە چیای سوڵتان یاقووبی نەغەدە و لە تەنیشت مەزاری محەممەد ئەوراز، شاخەوانی ئەفسانەییی کورد بە خاک سپێردران.