کوردشۆپ -
ئارمیتا گەڕاوەند، کچە کوردی خەڵکی پارێزگای کرماشانی ڕۆژهەڵاتی کورستان کە لەگەڵ بنەماڵەکەی نشتەجێی تاران بوون، ڕۆژی 9ی ڕەزبەر (1ی ئۆکتۆبەر)ی ئەمساڵ، لە کاتێکدا کە لەگەڵ دوو هاوڕێی بەرەو قوتابخانە دەچوون، لە میترۆی تاران کەوتە بەر هێرشی هێزەکانی پاسەوانی حیجاب و بە هۆی لێدان لە سەری کەوتە کۆماوە و گوازرایەوە بۆ نەخۆشخانەی فەجری تاران کە سەر بە ئەڕتەشی ئەم وڵاتەیە.
لە ماوەی 28 ڕۆژی ڕابردوودا دۆخێکی ئەمنیی قورس بەسەر نەخۆشخانەکەدا زاڵ بوو. ئەو ڕۆژنامەنووسانەی بۆ ئامادەکردنی راپۆرت سەبارەت بەم ڕووداوە ڕوویان لەم نەخۆشخانەیە کرد دەستبەسەر کران و بنەماڵەی ئارمیتاش کەوتنە ژێر گوشاری هێزە ئەمنییەکان و ڕێگای هەر جۆرە بڵاو کردنەوەیەکی زانیارییان لێ گرتن.
ئارمیتا پاش 28 ڕۆژ مانەوە لە کۆمادا ئەمڕۆ لە کاتێکدا گیانی سپارد کە هێزەکانی حکوومەت لەو ماوەیەدا هەوڵیان داوە ڕاستیی ڕووداوەکە لە ڕای گشتی بشارنەوە. ئەم کچە کوردە کە تەمەنی 17 ساڵ بوو، پازدە ڕۆژ پاش یەکەم ساڵوەگەڕی کوژرانی ژینا ئەمینی لە لایەن پۆلیسی گەشتی ئیرشادی تارانەوە، بە دەستی گرووپێکی نوێی سەرکوتکەر بە ناوی پاسەوانی حیجاب گیانی لەدەست دا.
لە پاش کوژرانی ژینا ئەمینی و هەڵگیرسانی شۆڕشی ژن – ژیان - ئازادی لە ڕۆژهەڵاتی کوردستان کە دواتر سەرانسەری ئێرانی گرتەوە، لادانی لەچک و ڕەت کردنەوەی حیجابی زۆرەملێ لە لایەن ژنان و کچانی ئێرانەوە بوو بە بەشێکی سەرەکی لەو خەباتە مەدەنییەی دژ بە حکوومەتی کۆماری ئیسلامیی ئێران هاتووەتە ئاراوە و لەم پێناوەشدا دەیان ژن و کچ بوونە قوربانی و سەدانیش کەوتوونەتە زیندان. ئارمیتا گەڕاوەند نوێترین قوربانیی شۆڕشی ژن-ژیان-ئازادی و ڕەتکردنەوەی حیجابی زۆرەملێیە.
