هاونیشتمانییان و کورستانیان
ماوەی حەفتەیەکە سوپای تورکیا بە بیانووی هێرشێکی پارتی کرێکارانی کوردستان لە شاری ئانکارا کە هیچ زیانێکی گیانی و ماددیشی لێ نەکەوتەوە، هێرشێکی بەربڵاوی بۆ سەر دامەزراوەکان و ژیرخانی ئابووری و هاووڵاتیانی مەدەنیی ڕۆژئاوای کوردستان دەست پێ کردووە.
ئەم هێرشانە کە دەیان شەهید و سەدان برینداریان لێ کەوتووەتەوە، لە ژێر سێبەری دەنگدانەوەی میدیایی شەڕی نێوان ئیسرائیل و حەماس لە غەززە، لە لایەن وڵاتانی جیهان و ڕێکخراوە نێودەوڵەتییەکانەوە تەواو پشتگوێ خراون و بێدەنگییان لێ کراوە و حکوومەتی تورکیاش بە کەڵک وەرگرتن لەم دەرفەتە، لە هێرشەکانی بۆ لە ناوبردنی دەسکەوتەکانی ڕۆژئاوای کوردستان بەردەوامە.
وەک ئاشکرایە، ڕۆژئاوای کوردستان و دەسەڵاتی خۆبەڕێوەبەریی باکوور و ڕۆژهەلاتی سووریا، هیچکات نەبووەتە سەرچاوەی هەڕەشە لە تورکیا و ئاسایشی ئەم وڵاتە؛ بەڵام تورکیا لە ساڵانی ڕابردووشدا چەندین جار بە پاساوی جۆراوجۆر هێرشی کردووەتە سەریان و چەندین ناوچەی ڕۆژئاواشی داگیر کردووە.
دەسەڵاتدارانی تورکیا هەموو کات رایانگەیاندووە دژی هەرجۆرە کیانێکی کوردین و تەنانەت ئەگەر کورد لەسەر مانگیش بتوانێ وڵاتێکی بۆخۆی هەبێ ئەوان دژی دەوەستنەوە. هەر بۆیە ئاشکرایە ئەو هێرشە نابەرابەرەی ئەمجارەش، لە هەمان بیری شۆفێنی و فاشیستیی دەسەڵاتدارانی تورکیاوە سەرچاوە دەگرێ.
ئێمە وەک رێکخراوی کوردشۆپ، هێرشەکانی سوپای تورکیا بۆ سەر رۆژئاوای کوردستان ئیدانە دەکەین و داوا لە کۆڕ و کۆمەڵە نیودەولەتییەکان و ڕێکخراوەکانی مافی مرۆڤ دەکەین، هەوڵەکانیان بۆ کۆتاییهێنان بەم هێرشانە و پاراستنی خەڵکی مەدەنیی رۆژئاوای کوردستان بخەنە گەڕ. هەروەها داوا لە دەسەڵاتدارانی حکوومەتی هەرێمی کوردستان دەکەین، لە ڕێگای ئەو پەیوەندییە دیپلۆماسییانەی لەگەڵ حکوومەتی تورکیا و باڵوێزخانەی وڵاتانی جیهان لە هەولێر هەیانە، هەوڵ بدەن کۆتایی بەم هێرشە نامرۆڤانەیە بهێنرێ.
ڕێکخراوی کوردشۆپ
٢٢ی رەزبەری ١٤٠٢ی هەتاویی
١٤ی ئۆکتۆبری ٢٠٢٣ی زایینی
