زاگرۆس جیلۆ
کوردشۆپ- هونەرمەندی ناوداری کورد، شوان پەروەر، بەرهەمێکی نوێی لەسەر سەدەمین ساڵیادی پەیمانی لۆزان، وەک هەڵوێستێک دژی ئەو ڕێککەوتنە، بڵاو کردەوە.
بەبۆنەی یادی سەد ساڵەی پەیمانی لۆزان کە بەهۆیەوە کوردستان دابەش کرا و دوای ئەو ڕێککەوتنە، سیاسەتی قڕکردن و ئاسمیلەکردن و کۆمەڵکوژی دژی گەلی کوردستان بەڕێوە چوو و گەلی کورد لە هەموو مافە سەرەتاییەکانی بێبەش کرا و تووشی ئازار و ستەم بوو، بەرهەمێکی نوێ لەلایەن هونەرمەندی کورد، شوان پەروەر، وەک هەڵوێستێکی هونەری لە دژی ئەو زوڵمەی کە چەندین سەدەیە بەردەوامە، بڵاو کرایەوە.
تێکست و ئاوازی گۆرانییەکە لەلایەن "شوان پەروەر"ەوە دانراوە، بەرهەمهێنانی میوزیکەکەی لەلایەن "هاکان ئاکای"ەوە ئەنجام دراوە، هەروەها وێنە و ڤیدیۆ کلیپەکەش لەلایەن "ڕۆهلات ئیبش"ەوە ئامادە کراوە. لە ڤیدیۆ کلیپەکەدا گرینگی بە پەیمانی لۆزان دراوە و ئازار و مەینەتییەکانی گەلی کورد لە ڕێگەی وشە و وێنەوە پیشان دەدرێت.
لە پەیمانی لۆزاندا کە کوردستان دابەش کرا، زوڵم و ستەمێکی گەورە بەرامبەر گەلی کورد ئەنجام درا و لە مێژووی هیچ نەتەوەیەکدا، ڕێکەوتنێکی تاکلایەنەی لەو شێوەیە کە ١٤ دەوڵەت کۆ ببنەوە و بڕیار لەسەر چارەنووسی نەتەوەیەک بدەن، نەبینراوە. هەروەها لە دوای ئەو ڕێککەوتنە هەموو جۆرە ستەمێک لەلایەن داگیرکەرانەوە لە کورد و کوردستان کرا و هەموو جیهان ئەمەیان بینی و پشتگوێیان خست و بگرە زۆرێک لە وڵاتانیش ڕەواییان بەم ستەمەی دژ بە کوردستان دا. ئەوەندەی داگیرکەران دژی کورد تاوانیان کرد، جیهانیش بە گرینگینەدانیان و بێدەنگییان، شەریکی ئەو تاوانانەن.
له دوای ئه‌و ڕێککه‌وتنه، داگیرکەرانی کوردستان، سەرکرده و ڕێبەرانی گه‌لی کوردیان له‌سێداره دا و تێرۆریان کردن و دەسبەسەریان کردن؛ هه‌موو جۆره ئه‌شکه‌نجه و لێدان و کۆمه‌ڵکوژی و سیاسه‌تی نکۆڵی و ئاسمیلاسیۆن، دژی گه‌لی کورد به‌ڕێوه چوو، به‌ڵام ته‌نانه‌ت تا ئه‌مڕۆش هیچ هه‌ڵوێستێک له بەرامبەر ئه‌و دڕنده‌یییه نیشان نادرێت.
بێگومان دەکرێت بڵێین کورد لە سەدەی ڕابردووشدا کەموکوڕیی زۆری هەبووە، نەیتوانی یەکڕیزیی بنیات بنێت، نەیتوانی خۆی ڕێک بخات و بەسەر کێشە ناوخۆییەکانیدا زاڵ بێت، نەیتوانی بە سیاسەتێکی نەتەوەیی بەسەر ئەو دابەشبوونەی ئێستادا زاڵ بێت. بەڵام هەرچییەک ڕووی دابێت، هەموو عەیب و کەموکوڕییەکانی کورد ڕەوایەتی بە ڕێککەوتنێکی لەو شێوەیە نادات و هیچ پاساوێک بۆ ئەو تاوانەی کە بەرامبەر گەلی کورد دەکرێت قەبووڵ ناکرێت و لە مێژووی مرۆڤایەتیشدا ئەم ڕێکەوتنە دەبێتە شەرمەزاری بۆ هەموو مرۆڤایەتی.
دەکرێت بڵێین ئەم بەرهەمە نوێیەی هونەرمەندی ناوداری کورد، شوان پەروەر، لە کات و سەردەمی خۆیدایە و هەڵوێستێکی گرینگی کوردایەتی و ناسیۆنالیزم و نیشتمانپەروەرییە دژی پەیماننامەی لۆزان و ئەو ستەمەی داگیرکەرانی کوردستان بە درێژایی ئەم سەد ساڵە لە کورد و کوردستانیان کردووە.
