هونەرمەندی شێوەکاری کورد، ئەحمەد خەلیلی فەرد خەڵکی شاری سنەی ڕۆژهەڵاتی کوردستان لە تارانی پایتەختی ئێران کۆچی دواییی کرد
ئەحمەد خەلیلی فەرد ساڵی 1950 لە شاری سنەی ڕۆژهەڵاتی کوردستان لەدایک بووە. خوێندنی سەرەتایی و ناوەند و دواناوەندیی لە سنە تەواو کردووە.
بڕوانامەی بەکالۆریۆسی هونەری لە کۆلێژی هونەرەجوانەکانی زانکۆی تاران وەرگرتووە. خوێندنی ماجستەری لە کۆلێژی هونەری زانکۆی "تەربیەت مودەڕڕیس"ی تاران تەواو کردووە. زیاتر لە بیست ساڵ لە زانکۆکانی تاران، زانکۆی هونەری یەزد و زانکۆی هونەری کرمان بووە مامۆستای هونەر و شێوەکاری بووە.
هەر لەم ماوەیەدا چەندین ڤۆرکشۆپ و خولی فێرکاریی شێوەکاریی لە وڵاتانی ڕووسیا، لوبنان، ئیتالیا، یومس بەنگلادش، چین و ... کردووەتەوە.
ئەو هونەرمەندە کوردە لە ماوەی تەمەنی هونەریی خۆیدا زیاتر لە 15 پێشانگاری تاکەکەسیی بەڕێوە بردووە و لە زیاتر لە 100 پێشانگای گرووپییشدا بەشدار بووە. جیا لەمانەش ژمارەیەک لە بەرهەمە شێوەکارییەکانی لەسەر جەند دیوارێکی تارانی پایتەختی ئێرانیش نەخشێنراوە.
کەلتوور و ژیان و جلوبەرگی کوردی ڕەنگدانەوەی لە زۆربەی تابلۆ شێوەکارییەکانی ئەحمەد خەلیلی فەرددا هەبووە.
جیا لە شێوەکاری کاری پەیکەرسازییشی کردووە و هەردوو پەیکەرەی "شاخەوان" و "سۆهرەوەردی" کە لە شاری سنە دانراون، لە بەرهەمەکانی ئەم هونەرمەندە کوردەن.
خەلیلی فەرد ئەندامی ئەنجومەنی شێوەکارانی ئێران و ئەنجومەنی دامەزراوەی پەرەپێدانی شێوەکاری لە ئێران بووە.
لە ساڵی 2002 دوو دیپلۆمی شانازی و میدالیای بڕۆنزی لە تری فاڵی پاریس لە فەڕەنسا وەرگرتووە.
میدالیای پلەیەکی هونەری لە وەزارەتی فەرهەنگی ئێران وەرگرتووە.
ناوبراو لە پاش چەند ساڵ نەخۆشی لە شاری تارانی پایتەختی ئێران، کۆچی دواییی کرد.
