لە شارۆچکەی جندیرێسی سەر بە عەفرینی ڕۆژئاوای کوردستان، لە شەوی نەورۆزدا، بە هۆی ئاهەنگگێڕان و داگیرساندنی ئاگری نەورۆز لەلایەن نیشتمانپەروەرانی شارەکە، هێرشێکی چەکداری لەلایەن چەکدارانی ئەحرار ئەلشەرقییە کرایە سەریان و 4 کەس گیانیان لەدەست دا.
لە شارۆچکەی جندیرێسی سەر بە عەفرین کە ئێستا لەژێر داگیرکاریی دەوڵەتی تورک و چەکدارانی ئۆپۆزسیۆنی سوریادایە، شەوی نەورۆز هێرشێکی چەکداری لە دژی هەوڵی کوردە نیشتمانپەروەرەکان کە دەیانویست نەورۆز بگێڕن، ڕووی دا و لە ئەنجامی لەو هێرشەدا 4 کوردی قەزاکە کوژران.
ڕووداوەکە لە شەقامی ١٦ی شاری جێندرێس و لە کاتێکدا ئەندام و نیشتمانپەروەرانی کورد کە ویستوویانە جەژنی نەورۆز بگێڕن ڕووی دا و لە کاتی هەڵگیرساندنی ئاگردا لە سەربانی ماڵانەوە تەقەیان لێ کراوە. ناوی ئەو چوار کوردەی لە هێرشەکەدا گیانیان لەدەست داوە بریتین لە: فەرحان عوسمان تەمەن ٤٣ ساڵ، ئیسماعیل عوسمان تەمەن ٣٨ ساڵ، محەممەد ئیسماعیل عوسمان تەمەن ١٨ ساڵ و محەممەد عوسمان تەمەن ٤٢ ساڵ.
