şadî
Kurdshop – Ajokarê kurd yê bi navê Isaac Turumlu ku bavê wî kurd û dayîka wî jî Îspanyayî ye û ser bi Tîma Kurdistan Racingê ye, li Almanyayê di pêşbirka ku beşdarî tê de kir, serkeftineke mezin bi dest xist.
Isaac Tutumlu bi otomobîla xwe ya taybet a ku nav û alaya Kurdistanê li ser e, di pêşbirka GT World Challengeyê de pileya sêyemîn bi dest xist.
Piştî serkeftina wî ya di sala 2019an, cara yekem e ku Tîma Kurdistan Racingê serkeftineke din a bi vî awayî bi dest dixe.
Isaac Tutumlu di derbarê serkeftina tîma xwe de ragehand, “Em gelekî kêfxweş in û ji niha ve xwe ji bo pêşbirk ango tûrnûvaya Barcelonayê amade dikin.”
Isaac Tutumluyê ajokarê Kurd, li ser serkeftin û rewşa xwe û otomobîla xwe ya ku pê beşdarî di pêşbirkê de kir anî ziman, “Me di pêşbirka GT World Challengeyê de serkeftineke din bi dest xist, pêşbirkeke balkêş bû, Ferrari û Renaldi pir bilez bûn.’’
Otomobîla min di ajotinê de pir baş û bilez bû, di dawiyê de me karî serkeftineke din ji bo Tîma Kurdistan Racingê bi dest bixin.”
Isaac Tutumlu bi navê xwe yê temam Isaac Tutumlu Lopez e û roja 5ê Tîrmeha 1985an li bajarê Barcelona ya Îspanyayê ji dayik bûye.
Bavê wî ji parêzgeha Amedê ya Bakurê Kurdistanê û dayika wî jî Îspanyayî ye. Isaac Tutumlu ajokarê otomobîlên pêşbirkan e.
Isaac Tutumlu kurê Bayram Tutumluyê yekem menajerê bi lîsansa FIFAyê yê Tirkiyeyê ye ku di futbolê de gelekî bi nav û deng e.
Isaac Tutumluyê ku di 21 saliya xwe de dest bi beşdariya pêşbirkan kir, di pêşbirkên navneteweyî de bi awayekî baş nûnertiya Kurd û Kurdistanê dike.
