35 sal bi ser terora Dr. Ebdulrehman Qasimlo û Ebdulah Qadirî Azer re derbas dibe. Doktor Qasimlo, dîplomatekî jêhatî, aborînasekî pispor, dîroknasekî xwedî ezmûn, siyasetmedarekî jêhatî, rêberekî neteweyî û mamosteyekî bîrmend bû ku zêdetirî çil sal ji jiyana xwe bo pêşvebirina tevgera Kurdî li Rojhilatê Kurdistanê û nasandina doza rewa ya Kurd li her çar parçeyên Kurdistanê li ser asta navdewletî terxan kir.
Terora Dr. Qasimlo û Ebdulah Qadirî Azar li ser maseya danûstandinê ji aliyê bi nav dîplomatên Komara Îslamî ya Îranêve, yek ji reştirîn rûpelên dîroka tijî ji tawanên Komara Îslamî ya Îranê û mînaka herî xuya ya terorîzma navneteweyî ya vê rejîma terorîstî ye.
Her çend dosyeya terora Dr. Qasimlo ji aliyê hikûmeta wê demê ya Otrîşê ve hate perdepoşkirin û terorîst ber bi Tehranê ve hatine îskortkirin, lê bîr û hizra Dr. Qasimlo 35 sal e di nav civaka Rojhilatê Kurdistanê de dimeşe û niha Dr. Qasimlo ji hemû demekê zêdetir li nav dilê xelkê Rojhilatê Kurdistanê û di rêbaza netewî ya xwe de zîndî ye û roj li pey rojê zêdetir di nav girseya Rojhilatê de cih digire.
Şoreşa Jin Jiyan Azadî li Rojhilatê Kurdistanê îspat kir ku rê û rêbaza Qasimlo, zêdetir ji sê dehik in piştî terorkirina wî jî, li ser şeqamên Rojhilatê Kurdistanê berdewam e û çiraya ronahîker a rêya xebatekê ye ku bi bidestanîna mafê netewayetî ya xelkê Rojhilatê Kurdistanê digihe encamê.
Di 35emîn salvegera şehîdbûna Dr. Ebdulrehman Qasimlo û Ebdulah Qadirî Azar de, em yad û bîra şehîdên Viyenê û hemû şehîdên rêya rizgariya Kurdistanê bi bilindî radigirin û tekezî dikin ku teror û tirsandin, nikare Kurdistaniyan ji xebata bo bidestanîna mafên wan poşman bike.

Saziya KURDŞOPê
13/7/2024