Kurdshop – Di pêşbirka Şampiyoniya Asya ya Guleşa Dest (Armwrestling) de, ku li Dubayî hat lidarxistin de, ciwanê Kurd cara 7emîn bû Şampiyon.
Şampiyoniya Asya ya Guleşa Dest (Armwrestling) ji 29ê Nîsanê heta 4ê Gulanê li Dubayî ya paytexta Mîrgehên Yekbûyî yên Erebî ango li Îmaretê hat lidarxistin.
Hat ragehandin di vê pêşbirk û Şampiyonîyê de ji 19 welatan werzişvan beşdar bûn.
Li gorî encamên pêşbirkê, werzişvanê Kurd ê ji Kazakistanê Ebdulmanaf Tuzuev hem di Guleşa Destê Rast û hem jî ya Destê Çep de bo cara 7an di giraniya heta 85 kg de bû Şampiyonê Asyayê.
Heta naha werzişvanê kurd Ebdulmanaf Tuzuev 3 caran bûye Şampyonê Cîhanî jî.
Ebdulmanaf Tuzuev li herêma Almata ya Kazakistanê ji dayik bûye û 24 salî ye.
Ebdulmenaf ji temenê xwe yê biçûkî heta naha bi Guleşa Dest re mijûl dibe û di asta herêm û navneteweyî de xwediyê çend sernav û destkeftan e:
Tuzuev heta naha di salên 2019, 2021 û 2022yê de 3 caran bûye Şampiyonê Cîhanê. Herwaha ji sala 2017ê heta sala 2023yê her sal li ser yek 7 caran bûye Şampiyonê Asyayê. Ji sala 2017ê heta sala 2023yê her sal li ser yek 7 caran bûye Şampiyonê Komara Kazakistanê. Werzişvanê serkeftî yê kurd di salên 2017 û 2021ê de 2 caran bûye Şampiyonê Kupaya vekirî yê Asyayê û ji sala 2017ê heta sala 2023yê 7 caran li ser yek jî bûye Şampiyonê bajarê Almata ya Kazakistanê.
