Kurdshop – Herêma Kurdistanê mafê mêvandariya Kupaya Cîhanî ya ji bo Herêman (CONIFA) ya sala 2024ê bi dest xist û Yekîtiya Futbola Kurdistanê jî dibêje, pêşbirk dê li qadên futbolê yên Herêma Kurdistanê bên lîstin.
Fermangeha Medya û Zanyariyan a Hikûmeta Herêma Kurdistanê jî ragihand, Herêma Kurdistanê mêvandariya Kupa Cîhanî ya Herêman a FIFAyê (CONIFA) bi dest xistiye.
Li ser vê mijarê Berdevkê Komîteya Olimpîk a Kurdistanê Şawan Ezîz ji Fermangeha Medya û Zanyariyan re ragihand: Pêşbirk dê li bajarên Hewlêr, Silêmanî, Dihok û Zaxoyê were lidarxistin.
Şandeke nûneratiya CONIFA di meha Adara 2023an de ji bo agahdarbûna ji rewşa ewlehiyê û asta yarîgehên Herêma Kurdistanê, serdana Herêma Kurdistanê kiribû.
Berdevkê Yekitiya Futbolê ya Kurdistanê Celal Seîd ragihand, ev pêşbirk di nîva sala bê (2024) de destpê dike û dê 16 herêm beşdariyê bikin.
Ji bo mêvandariya vê pêşbirkê 8 herêman serlêdan kiribûn, lê di dawiyê de Herêma Kurdistanê mafê mêvandariya çapa çarem a Kupayê wergirt.
CONIFA rêxistineke cîhanî ya qazancnexwaz e, piştgiriya tîmên futbolê yên herêman dike, di Hezîran a 2013an de hat damezrandin û yekemîn pêşbirk di Hezîrana 2014an de li Swêdê bi beşdariya 12 herêman hat lidarxistin.
