- کوردشۆپ

ڕۆژی یەکشەممە ڕێکەوتی ٢٩ی ڕێبەندانی ١٤٠٢ی هەتاوی، هەژدەهەمین فێستیڤاڵی نێونەتەوەییی شانۆی کوردیی سەقز، بە بەڕێوەچوونی شانۆی شانۆکارانی پارێزگاکانی کرماشان و ورمێی ڕۆژهەڵاتی کوردستان، لە هۆڵی "پلاتۆ"ی شاری سەقز، دەستی پێ کرد.

بۆ فیستیڤاڵی ئەمساڵ هەشت شانۆنامە لە باشووری کوردستان، دوو شانۆنامە لە ڕۆژاوای کوردستان و دوو شانۆنامەش لە باکووری کوردستانەوە بۆ ئۆفیسی ئامادەکاریی فێستیڤاڵی شانۆی کوردیی سەقز بەڕێ کرابوون کە لە ئەنجامدا تەنیا چوار شانۆنامە لە باشووری کوردستانەوە بۆ بەشداری لە فێستیڤالەکە هەڵبژێردران. هەروەها لە ڕۆژهەڵاتی کوردستانیشەوە نۆزدە شانۆنامە بۆ ئەم فێستیڤالە بەڕێ کرابوون کە هەشت شانۆنامەیان لەلایەن دەستەی داوەرانەوە بۆ بەشداری لە بەشی پێشبڕکێ هەڵبژێردران. شایانی باسە کە شانۆیەکیش لە باشووری کوردستان وەک شانۆی میوان لەم فێستیڤاڵەدا بەشدارە.

فێستیڤاڵی شانۆی کوردیی سەقز چوار ڕۆژ دەخایەنێت و هەموو شانۆکانی بەشدار لەو فێستیڤاڵەدا بە زمانی کوردین و هەر دەرهێنەرێک تەنیا بە یەک شانۆ بەشدارە. هەروەها بڕیارە ڕۆژی پێنجشەممە ڕێکەوتی ٣ی ڕەشەمە، ڕێوڕەسمی کۆتاییهاتنی ئەم فێستیڤاڵە بەڕێوە بچێت و گرووپ و کەسە یەکەمەکان لە بەشە جیاوازەکاندا بناسێنرێن.

ڕۆژی یەکشەممە و لە یەکەم ڕۆژی فێستیڤاڵەکەدا، دوو شانۆ بە ناوەکانی "سێ ئافرەت" لە کرماشان و "کەلەدۆشا عەلۆکێ" لە ورمێ، پێشکەشی هونەردۆستان و شانۆکاران کران.

ڕۆژی دووشەممە و لە دووەم ڕۆژی فێستیڤاڵەکەدا، چوار شانۆ بە ناوەکانی "هۆشیاری تارمایێک" لە دهۆک، "ئۆدیپ شاریار" لە سەقز، "دەروێش یان گۆدۆ" لە دهۆک و "پیشەگەر" لە کەرکووک نمایش کران.

هەروەها ڕۆژی سێشەممە و لە سێیەم ڕۆژی فێستیڤاڵەکەدا، سێ شانۆ بە ناوەکانی "تاسە" لە سنە، "کڵاو و پێک" لە دهۆک (میوان) و "مرۆڤم بینی بەبێ جل" لە کەرکووک پێشکەش کران.

بڕیارە ڕۆژی چوارشەممە و لە دوایین ڕۆژی بەڕێوەچوونی شانۆکانی ئەم فێستیڤاڵەدا، چوار شانۆ بە ناوەکانی "ئەو باڵندەی کە..." لە سنە، "یاسای پەلکە سوورەکان" لە قوروە، "مەم و زین" لە ورمێ و "بووکێکمان هەیە و زەماوەندێ" لە سنە" نمایش بکرێن. شایانی باسە کە ڕۆژی پێنجشەممەش ڕێکەوتی ٣ی ڕەشەمە، بەرنامەی کۆتاییی فێستیڤاڵەکە بەڕێوە دەچێت و گرووپ و کەسە یەکەمەکان لە بەشە جیاوازەکاندا دەناسێنرێن.

فێستیڤاڵی شانۆی کوردیی سەقز دوای فێستیڤاڵی نیونەتەوەییی شانۆی سەرشەقامی مەریوان، گەورەترین فێستیڤاڵی شانۆی ڕۆژهەڵاتی کوردستانە کە لە ساڵی ١٩٩٩ی زایینییەوە هەتا ئێستا ساڵانە بەڕێوە دەچێت. هەروەها سەرەڕای هەوڵەکان بۆ تۆمارکردنی ئەم فێستیڤاڵە لە ئاستی سەرتاسەریی ئێراندا، هێشتا وەزارەتی فەرهەنگ و ئیرشادی ئێران ئەم فێستیڤاڵەی تۆمار نەکردووە، بۆیە بودجەشی بۆ تەرخان ناکات.