- کوردشۆپ
"شەهرام شکاکی"، هونەرمەندی خەڵکی ڕۆژهەڵاتی کوردستان، لە لاپەڕەی تایبەتی خۆی لە فەیسبووک ڕایگەیاند کە کتێبێکی بە ناوی "گولدەستەیا ئاوازان" (گوڵدەستەی ئاوازەکان)، چاپ و بڵاو کراوەتەوە.
هونەرمەند "شەهرام شکاکی" لەمبارەوە ڕایگەیاند: "دەمەوێت لایەنگران و شوێنکەوتووانی مۆسیقا و هونەری کوردی ئاگادار بکەمەوە کە کتێبەکەم بە ناوی 'گولدەستەیا ئاوازان' کە هەڵبژاردەی ئاواز و کەلامی منە و چل ساڵ خەبات و کارکردنی منی لەخۆ گرتووە، چاپ و بڵاو کراوەتەوە. ئەم بەرهەمە وەک بەرهەمێک بۆ هونەرمەندان و ئاشقانی مۆسیقای کوردی ئامادە کراوە، هیوادارم توانیبێتم خزمەتێکی باشم بە هونەر و مۆسیقای کوردی کردبێت."
ئەم کتێبە کە لە ئێستادا لە وڵاتی "کانادا" بەردەستە، بۆ ئەو کەس و لایەنانەی کە دەیانەوێت مۆسیقای فۆلکلۆر بە شێوەیەکی زانستی، مێژوویی، کۆمەڵناسی و کەلتووری بناسن و لێکۆڵینەوەی لەسەر بکەن، دەتوانێت سەرچاوەیەکی زۆر باش بێت، چونکە ئەم بەرهەمە لەمبارانەوە نموونەی زۆر باشی پێشکەش کردووە.
شەهرام شکاکی کێیە؟
"شەهرام شکاکی"، سترانبێژ، دەنگبێژ، ئاوازدانەر، شاعیر و لێکۆڵەر، ساڵی ١٩٦٥ی زایینی لە گوندی دۆستان لە ناوچەی شپیران، سەر بە شاری دیلەمان لە پارێزگای ورمێی ڕۆژهەڵاتی کوردستان لەدایک بووە. ناوبراو زیاتر لە ٣٤ ساڵە لەگەڵ بنەماڵەکەی لە کانادا دەژین. شەهرام شکاکی لە عەشیرەتی ڕێبەری ناوداری کورد، "سمکۆی شکاک"ە و لە ئیلی "ئەڤدۆیی"یە، لە خێڵی نێعمەتی. باپیری ئەو، "مهۆ"، لە کاتی ڕاپەڕینی کوردانی ڕۆژهەڵات، لە شاری تەورێز لەگەڵ "جەوار ئاغا" شەهید بووە.
"شەهرام شکاکی" دوای خوێندنی سەرەتایی لە گوندی دۆستان، بۆ خوێندنی ناوەندی دەچێتە شاری سەڵماس. دوای وەرگرتنی بڕوانامەی "دیپلۆم" دەیەوێت بچێتە زانکۆ و لەوێ درێژە بە خوێندن بدات، بەڵام بەداخەوە بەهۆی هەندێک هۆکار ناتوانێت ئەو کارە بکات.
خۆشەویستی و خولیای "شەهرام" بۆ مۆسیقا و هونەری گۆرانی و ئاواز وای لێ کردووە کە بە شێوەیەکی زانستی و ئەکادیمی بکەوێتە دوای مۆسیقا، بەتایبەتی سترانبێژی. ئەم هونەرمەندە بەداخەوە لەنێو خەڵکدا کەمتر ناسراوە، ئەمە لە حاڵێکدایە کە شەهرام هەم سترانبێژە، هەم دەنگبێژە، هەم تەنبوورژەنە، هەم ستراننووسە و هەم لێکۆڵەریشە.
ناوبراو نزیکەی دوو ساڵ لە شاری قۆنیای تورکیا پەروەردەی تەنبووری دیتووە و بە مامۆستایەتیی "عەبدولڕەحمان پارلاک" لە "فاڤار میوزیک" بڕوانامەی وەرگرتووە. شەهرام لە ئێستادا یەکێکە لە تەنبوورژەنە پسپۆڕەکان. ناوبراو جگە لە کارە هونەرییەکانی، مامۆستای زمانی کوردییە و ساڵانێکە منداڵانی کورد فێری خوێندن و نووسینی زمانی دایکیی خۆیان دەکات.
ئەم هونەرمەندە کوردە هەتا ئێستا خاوەنی زیاتر لە ٨٠ کەلامە کە بەشێکیان لەلایەن هونەرمەندانەوە گوتراونەتەوە. شایانی باسە کە شەهرام شکاکی ئەرشیڤێکی دەوڵەمەندی ستران و ئاوازی سترانبێژان و دەنگبێژانی ناوچەکەی خۆی کۆ کردووەتەوە کە گەنجینەیەکی زۆر بەنرخە.
هەندێک لە بەرهەمەکانی شەهرام شکاکی بریتین لە:
نووژینێ: ساڵی ١٩٤٤ی زایینی، جەماڵ تیرێژ لە "سی‌دی"ی خۆیدا خوێندوویەتی. بە گوتەی ئەم هونەرمەندە، بەداخەوە "کۆما برا"یش ئەم سترانەیان کردووە بە کلیپ بۆ خۆیان، بەڵام ناوی خاوەنی شیعر و ئاوازەکەیان لەقەڵەم خستووە.
بنەڤشا من: خەمگین بیرهات.
ها گولا من: مامۆستا شوان پەروەر.
دایکا دەلال: لەیلا خان لە "سی‌دی"ی خۆیدا خوێندوویەتی.
وایە وایە: خەمگین بیرهات لە "سی‌دی"ی خۆیدا خوێندوویەتی.
