سەیوان ئیبراهیمی، مامۆستای زمانی کوردی و ئەندامی لێژنەی بەڕێوەبەریی ئەنجومەنی فەرهەنگی-کۆمەڵایەتیی "نۆژین"، کە لە لایەن لقی 106ی دادگای تاوانەکانی سنەوە بە تۆمەتی "تێکدانی ئاسایشی گشتی سزای یەک سال بەندکران، دوورخرانەوە لە زێدی خۆی و 40 قەمچی"ی بەسەردا سەپابوو، بە مەبەستی تێپەڕاندنی ماوەی یەک ساڵ بەندکرانی، دەستبەسەر و ڕەوانەی بەندیخانەی ناوەندیی شاری سنە کرا. لە مانگی سەرماوەزی ئەمساڵدا دادگای پێداچوونەوەی ئێران سزای "یەک ساڵ بەندکران و چل قەمچی"ی بۆ سەیوان ئیبراهیمی پشتراست کردبووەوە و سزای دوورخرانەوەی لە زێدیی خۆی ڕەت کردبووەوە.
سەیوان ئیبراهیمی لە دۆسیەیەکی دیکەشدا لە لایەن لقی یەکی دادگای شۆڕشی سنەوە، بە تۆمەتی "پێکهێنانی گرووپ و دەستە بە مەبەستی تێکدانی ئاسایشی گشتی" بە 10 ساڵ بەندکران و بە تۆمەتی "چالاکی و بانگەشە لە دژی حکوومەتی ئیران" بە یەک سال بەندکران سزا دراوە. ئەم دۆسیەیەش لە دادگای پێداچوونەوەیە و ئەگەر پشتراست بکرێتەوە، ئەم مامۆستایە لانی کەم سزای دە ساڵ بەندکرانی دیکەشی لەسەر جێبەجێ دەکرێت.
سەیوان ئیبراهیمی، کە هاوژینی مامۆستا "زارا محەممەدی"یە پێشتر لە لاپەڕە ئینستاگڕامییەکەی خۆیدا، "بەرپرسیاریەتی لە ئەنجومەنی نۆژین و چالاکییەکانی لەو ئەنجوومەنە"، "پاڵپشتیکردنی لە بەرخۆدانی هاوژینەکەی، زارا محەممەدی"، "بڵاوکردنەوەی وێنەی شەهیدان لە تۆڕە کۆمەلایەتییەکان" و هەروەها "پەیوەندی لەگەڵ کاناڵی کوردتیڤی"ی بە هۆکاری دەرچوونی ئەم سزایانە ناوبردبوو و جەختیشی کردبووەوە لە هەبوونی کاناڵێک بە ناوی کوردتیڤی ئاگادار نییە.
