گۆڤاری کوردستان لەنێوان ساڵانی ١٩١٩- ١٩٢٠ چاپ و بڵاو کراوەتەوە و گۆڤارێکی فیکریی سیاسی، کۆمەڵایەتی، ئەدەبی و زانستی بووە. یەکەم ژمارەی لە ٣٠ی کانوونی دووەمی ١٩١٩ دەرچووە و ١٩ ژمارەی چاپ کراوە. نزیکەی ١٠٣ ساڵ بەسەر چاپکردنی ژمارەی یەکەمدا تێدەپەڕێت و یەکەمجارە سەرجەم ژمارەکانی بەیەکەوە لەگەڵ وەرگێڕان و ئەسڵی خۆیان لە کتێبێکدا چاپ بکرێن.
خاوەن ئیمتیاز و بەرپرسی گۆڤاری کوردستان، محەممەد میهری و سەرنووسەرەکەشی "ئارواسیزادە محەممەد شەفیق" بوو، لە ژمارەی ١٣ بەدواوە سەید حوسێن بوو بە بەرپرسی گۆڤارەکە. محەممەد میهری، ڕووناکبیرێکی کورد بوو لە سەدەی بیستەمدا. ئەو یەکێک لە ئەندامە چالاکەکانی ڕێکخراوەکان و بڵاوکراوەکانی ئەو سەردەمە بوو و لە بڵاوکراوەی وەک "ڕۆژی کورد، هەتاوی کورد، ژین، کوردستان و هەتاو" و هتد چالاک بووە. زۆرێک لە گوتار و نووسینەکانی لەسەر بابەتەکانی زمانەوانی، ئەدەبی، سیاسی، فەلسەفی، کۆمەڵایەتی و کەلتووری بووە. بۆیە لەنێو هاوچەرخەکانیدا بە ناو و نازناوی جیاواز ناسراوە؛ بە زمانناس، شاعیر، نووسەر، سیاسەتمەدار، ڕۆژنامەنووس، ڕەخنەگر، مامۆستا و پارێزەر ناسراوە.
وێنە: محەممەد میهری
کاتێک لە لاپەڕە و ژمارەکانی گۆڤاری کوردستان ورد بینەوە، دەبینین کە چەندین بابەتی سەرنجڕاکێش سەبارەت بە زمان، ئەدەب، مێژوو، بارودۆخی کۆمەڵایەتی و سیاسیی کورد و کوردستان لەلایەن کۆمەڵێک وەستای قەڵەمەوە بڵاو کراونەتەوە. محەممەد میهری، خاوەنی گۆڤارەکە، ناوەڕۆکی هەر ژمارەیەکی کوردستانی بە چەندین بابەت و گوتاری جیاواز دەوڵەمەند کردووە؛ بەتایبەت نووسینەکانی لەسەر زمان و ئەدەبی کوردی، هەریەکەیان نووسینێکی زۆر گرینگن. ناوبراو لەژێر سەردێڕی "نموونەیەک لە ئەدەبیاتی کوردی" وەهای نووسیوە: "ڕەنگە ئەم ڕستەیە لەلایەن زۆر کەسەوە وەک سوپرایزێک بێت و ڕەنگە ببێتە هۆی سەرسووڕمانی زیاتری هەندێک کەسیش. بۆیە زۆر کەس دەڵێن "ئایا زمانی کوردی بۆ ئەدەبیات گونجاوە، ئەدەبیاتی کوردی بوونی هەیە؟" بە مەبەستی وەڵامدانەوەی ئەم پرسیارانە، "من بە شێوەی کورمانجی و گۆرانی، لە ئەدەبیاتی کوردی هەندێک غەزەڵ، بەیت، ستران، گۆرانی، لاوژە، حەیرانۆک و لاوک پێشکەشی ئێوە دەکەم." هەروەها لە کتێبی "موقاددیمەتوول ئیرافان" سەبارەت بە زمانی کوردی، زنجیرە گوتارێکیشی لەژێر ناوی "ئیرفان" و "ئەساس" بڵاو کردووەتەوە کە تیشکیان خستووەتە سەر فۆنێتیکی زمانی کوردی و بەراوردکردنی گۆڕانکارییە دەنگییەکانی نێوان زاراوە کوردییەکان.
بەکورتی، کاتێک سەرنج دەدەینە ناوەڕۆکی دەق و ناسنامەی نووسەرانی گۆڤاری کوردستان، دەبینین دوو لایەنی گرینگی ناوەڕۆک و ئامانجی گشتیی بڵاوکراوە و خەباتی ڕۆشنبیریی ئەو سەردەمە دەردەکەون: یەکەم؛ ئەنجامدانی لێکۆڵینەوە لەسەر زمان، ئەدەب، مێژوو، کەلتوور و بارودۆخی کۆمەڵایەتی و سیاسیی نەتەوەی کورد. دووەم؛ هۆشیارکردنەوە و پەرەپێدانی هزری نەتەوەییی کوردستان بە لێکۆڵینەوە و ڕوونکردنەوەی ئەو تەوەرە جۆراوجۆرانە.
وێنە: سەعید ڤەرۆژ، ئامادەکاری کتێبی "گۆڤاری کوردستان"
