چاپی ئەسڵیی ئەم بەرهەمە بە زاراوەی سۆرانی و بە پیتی ئارامی، ساڵی ٢٠٠١ لەلایەن وەشانگەی "ئاراس" لە باشووری کوردستان چاپ و بڵاو کراوەتەوە.
ئەم بەرهەمە یەکێکە لە گرینگترین و باشترین بەرهەمەکانی کتێبخانەی کوردی کە مێژووی ئەدەبی کوردی دەگێڕێتەوە و لە نزیکەی سێ هەزار لاپەڕە پێک دێت. ئەم کتێبە بەرهەمی چەندین ساڵ کار و تێکۆشانی دوکتۆر مارف خەزنەدارە.
"ڕێکخراوەی زمانی کوردی" بە هاوبەشی لەگەڵ وەشانگەی "نەقش" ئەم بەرهەمەیان کردووە بە کوردیی کورمانجی بە پیتی لاتین. ئەم کۆبەرهەمە لە حەوت بەرگ پێک هاتووە و لە هەر بەرگێکدا قۆناغێکی تایبەتی ئەدەبی کوردی باس کراوە:
بەرگی یەکەم، لە سەرەتاوە هەتا سەدەی چواردەهەم.
بەرگی دووەم، لە سەدەی چواردە هەتا هەژدەهەم.
بەرگی سێیەم، لە نیوەی یەکەمی سەدەی نۆزدەهەم.
بەرگی چوارەم، لە نیوەی دووەمی سەدەی نۆزدە و سەرەتای سەدەی بیستەم.
بەرگی پێنجەم، لەنێوان هەردوو شەڕی یەکەم و دووەمی جیهانی لە سەدەی بیستەمدا.
بەرگی شەشەم، لە ساڵی ١٩١٤ هەتا ١٩٤٥.
بەرگی حەوتەم، لە ساڵی ١٩٤٥ هەتا ١٩٧٥ بوو.
بەرهەمی "مێژووی ئەدەبی کوردی" لە نووسینی دوکتور مارف خەزنەدار لەلایەن ئەم کەسانەوە وەرگێڕدراوە:
"ئیبراهیم شادمان، سەرگوڵ ئارەش، بەسام مستەفا، موراد میلان و ڕۆنیا چالی".
دوکتۆر مارف خەزنەدار کێیە؟
ناوی "مارف عەبدولقادر مارف ئەحمەد ئاغا ڕەسووڵ ئاغا خەزنەدار"ە، ڕێکەوتی ١ی مانگی ١١ی ١٩٣٠ی زایینی لە شاری هەولێر لە باشووری کوردستان لەدایک بووە. خوێندنی سەرەتایی و ناوەندیی لە شاری هەولێر تەواو کردووە و قۆناغی ناوەندیشی لە شاری کەرکووک تەواو کردووە. بنەماڵەی دوکتۆر مارف لە بنەڕەتدا خەڵکی شاری سلێمانین، بەڵام دوای شەڕی جیهانیی یەکەم چوونەتە شاری هەولێر.
د. مارف خەزنەدار لە چەندین گۆڤار و ڕۆژنامەدا وەک نووسەر و سەرنووسەر کاری کردووە، هەروەها بە درێژایی تەمەن و کارەکانی ئەندامی زۆرێک لە سەندیکا و ڕۆژنامە و دامەزراوە تایبەتەکان بووە. دوکتۆر مارف ٣٢ کتێبی چاپ و بڵاو کردووەتەوە، لە گرینگترین بەرهەمە چاپکراوەکانی دەتوانین ئاماژە بە کتێبی "مێژووی ئەدەبی کوردی" بکەین، کە لە حەوت بەرگ پێک هاتووە.
د. مارف خەزنەدار، ڕێکەوتی ٢٥ی مانگی ١٠ی ٢٠١٠ لە تەمەنی ٨٠ ساڵیدا لە شاری هەولێر کۆچی دوایی کرد.
