کورشۆپ: دوابەدوای ئاگربەردانی بەئەنقەست لە دارستان و لەوەڕگەکانی ڕۆژهەڵاتی کوردستان، شەپۆلێک لە پشتیوانیی چالاکانی مەدەنی و ڕێکخراوە کوردستانییەکان بۆ خاوەندارێتیکردن لە ژینگە و ژینگەپارێزانی نیشتمان دەستی پێ کردووە.
بەپێی ئەو هەواڵ و وێنە و ڤیدیۆگەلەی کە لە ماڵپەڕ و تۆڕە کۆمەڵایەتییەکان بڵاو کراونەتەوە، لە ماوەی ڕۆژانی ڕابردوودا، شەپۆلێکی بەرفراوان لە پشتیوانیی خەڵک، چالاکانی مەدەنی، هونەرمەندان، نووسەران و شاعیران و ڕێکخراوە کوردستانییەکان لە ژینگە و ژینگەپارێزانی نیشتمان، بە شێوازی جۆراوجۆر، دەستی پێ کردووە و لە ئێستادا بە گڕوتینێکیی زۆرەوە بەردەوامە.
وێڕای ئەوەی کە ژینگەپارێزان و کەسانی خۆبەخش لە شارە جیاجیاکانی کوردستان بە هانای ئەو ناوچانەوە دەچن کە دارستان و لەوەڕگەکانیان تووشی سووتان بوون، خەڵک و چالاکانی مەدەنی لە سەرتاسەری کوردستان، لە ڕێگای یارمەتیی ماڵیی ئەنجومەنە ژینگەییەکان و ژینگەپارێزان، خاوەندارێتیی خۆیان لە ژینگە و ژینگەپارێزانی وڵات ڕاگەیاندووە.
لەلایەکی ترەوە ناوەندی نووسەرانی کوردستان ڕێکەوتی ١٥ی گەلاوێژ بە دەرکردنی پەیامێک داوای لە نووسەران و شاعیران و هونەرمەندانی کورد کرد کە بە هەر شێوازێک کە دەتوانن لەمبارەوە پشتیوانیی خۆیان دەرببڕن و لە ئاکامدا کۆمەڵێکی زۆر لە ئەو توێژانەی کۆمەڵگە وێڕای پشتیوانیی خۆیان لە ژینگەپارێزان و خەمخۆرییان بۆ ژینگەی نیشتمان و مەحکوومکردنی بکەرانی سووتاندنی دارستانەکان، بە بڵاوکردنەوەی کورتە ڤیدیۆ لە لاپەڕەکانی خۆیان و لاپەڕەکانی ناوەندی نووسەرانی کوردستان، داوای هەڵوێستنواندنی جیددیی کۆمەڵانی خەڵکی کوردستان دەکەن.
لە بەشێک لە پەیامەکەی ناوەندی نووسەرانی کوردستاندا هاتووە: "نیشتمان بۆ ئێمە تەنیا جوغرافیایەک و پانتایەکی ڕووت و پەتی نییە، بەڵکوو دار و بەردی ئەم خاکە سەدان بەسەرهات و قارەمانەتیی تێیدا پەنگی خواردووەتەوە. هەر دارێکمان بە سەدان جار قارەمانانی نیشتمانی لەژێر سێبەری خۆیدا پەنا داوە، ئەو قارەمانانەی کە گیانی خۆیان داوە هەتا دەستی پیسی دوژمن و بێگانە نەگاتە جەستەی پیرۆزی نیشتمان. لە ئێستادا کە بەشێک لە جەستەی نیشتمانمان لەلایەن دوژمنی دڵڕەق و سوێندخواردووی کوردستانەوە گڕی تێ بەر دراوە، ئەرکی هەموومانە بە هانایەوە بڕۆین و نەهێڵین خەونی دوژمن کە چاوی بە بەژن و باڵای جوان و ڕازاوەی نیشتمانمان هەڵنایە، بێتە دی. لێرەوە داوا لە سەرجەم دڵسۆزانی نیشتمان و کوردستان دەکەین کە بە هەر شێوە و ڕێگایەک کە دەتوانن بە هانای ژینگەپارێزانی نیشتماندۆست و تیمە خۆبەشەکانەوە بڕۆن و بە یارمەتی و هاوکارییان باری قورسی ئەو ئەرکە نیشتمانییەیان لەسەر کەم بکەنەوە."
هەر لەم پێوەندییەدا، زۆرێک لە ڕێکخراوە و ئەنجومەنەکانی کوردستان لەوانە: "ئەنجومەنی مەولەویی کورد و ماڵی وەرگێڕانی هۆژین لە سنە و کۆمیتەی سەرانسەریی خوێندکارانی کوردستان و..." و هەروەها حیزبەکانی ڕۆژهەڵاتی کوردستان، بە دەرکردنی پەیام، پشتیوانیی خۆیان لە ژینگەپارێزانی کوردستان و ئەو کەسانەی کە بە گیانفیداییەوە بە هانای ژینگەی وڵاتەوە دەچن، دەربڕیوە و ڕایانگەیاندووە کە دەستوپێوەندییەکانی حکوومەتی ئێران و کەسانی هەلپەرست بە هۆکارە سەرەکییەکانی ئاگری دارستانەکانی کوردستان دەزانن.
لە بەشێک لە پەیامی هاوبەشی ئەنجومەنی مەولەویی کورد و ماڵی وەرگێڕانی هۆژین لە سنە هاتووە: "ئێمەی کورد تاڵی و سوێری و چەرمەسەریی زۆرمان دیتووە و ئەمەش نە یەکەم جارە و نە دوایین جاریشە. بۆیە دەبێ وەک هەمیشە بە یەکگرتوویی و هاسۆزییەوە، سەربەرزانە لەم دۆخە بپەڕێینەوە تاکوو لە کۆتاییدا نیشتمان بگەیەنینە کەناری ئارام و لە باوەشیدا بحەسێینەوە. ئێمە پێزانی هەوڵ و تێکۆشان و لەخۆبوردووییی ڕۆڵە نەبەزەکانی زاگرۆسین و پشتیوانیی خۆمان بۆ ئەنجومەنی سەوزی چیا ڕادەگەیەنین و شانازییان پێوە دەکەین و یادی شەریف باجوەرەکان بەرز ڕادەگرین. هەر بۆیە داوا لە سەرجەم هاووڵاتییان و ڕێکخراوەکان دەکەین بە هەر جۆرێک کە دەتوانن یارمەتیدەر و پاڵپشتی ئەوان بن."
لەم پێوەندییەدا کۆمیتەی سەرانسەریی خوێندکارانی کوردستان، لە پەیامێکدا کە ڕۆژی دووشەممە ڕێکەوتی ١٦ی گەلاوێژ، بڵاوی کردووەتەوە، داوا لە هەموو خوێندکاران لە سەرانسەری کوردستان و ئێران دەکات بۆ ڕاگیرکردنی ئاگری دارستانەکانی زاگرۆس بە هانای ژینگەپارێزانەوە بچن.
لە بەشێک لە پەیامی ئەم کۆمیتەیەشدا هاتووە: "پاراستنی ژینگەی کوردستان بەشێکە لە شۆڕشی کوردستان و ئەرکی هەموو کوردێکی نیشتمانپەروەرە. هەر بەم هۆیەوە کۆمیتەی سەرانسەریی خوێندکارانی کوردستان داوا لە هەموو خوێندکاران لە سەرانسەری کوردستان و ئێران دەکات بۆ ڕاگیرکردنی ئاگری دارستانەکانی زاگرۆس بەهانای ژینگەپارێزانەوە بچن."
شایانی باسە کە لە ماوەی ڕۆژانی ڕابردوودا، نزیکەی ٢ هەزار هێکتار لە دارستانەکانی مەریوان لە ئاگردا سووتێنراون و ژینگەپارێزان و خەڵکی خۆبەخش بە کەمترین ئیمکانات و بەبێ یارمەتیی ناوەندە پێوەندیدارەکانی حکوومەتەوە، بە هانای دارستان و لەوەڕگەکانی نیشتمانەوە چوون.
هەروەها دەیان هێکتار لە لەوەڕگە و دارستانەکانی داڵاهوو سەر بە شارستانی کرند لە پارێزگای کرماشان، بەئەنقەست سووتێنراون و تەنیا لە ناوچەی "قەراویز" زیاتر لە ٤٠ هێکتار دارستان لە ئاگردا سووتاوە.
لەلایەکی ترەوە سەدان هێکتار لە لەوەڕگە و دارستانەکانی "کامێران، سەردەشت، ڕەبەت و بانە" لەلایەن نەیارانی ژینگەوە لە ئاگردا سووتێنراون و ژینگەپارێزانی کوردستان لەمبارەوە بەرگرییەکی قارەمانانەیان نواندووە.
لە کۆتاییشدا ئاماژە بەوە بکەین کە لە ڕەوتی سووتانی دارستان و لەوەڕگەکانی مەریوان، پێنج چالاكی ژینگەپارێزی مەریوان بە ناوەکانی "ئازاد ڕۆحی، لایەق ئەحمەدی، سەرکەوت عێبادی، ئالان ئەردەشیری و دلێر مەحەممەدی"، لەلایەن ناوەندە ئەمنییەتییەکانی حکوومەتەوە دەسبەسەر كران و ئێستاش چارەنووسیان ناڕوونە.
