کوردشۆپ-

لە ساڵی ٢٠١١وە ناوەندی ڕۆشنبیری و هونەریی جگەرخوێن لە شاری ئامەدی باکووری کوردستان، فێستیڤاڵێکی فیلمی دۆکیۆمێنتاری بە ناوی "فیلمئامەد" سازکرد و ٧ خولی ئەم فێستیڤالە بەڕێوەچوو، بەڵام دوای ئەوەی حکومەتی تورکیا شارەوانیی ئامەدی گرتە دەست، وەک زۆرێک لە چالاکییەکانی دیکە، ئەم فێستیڤالەش ڕاگیرا. ئێستا فیلمئامەد جارێکی تر دەستی پێکردووە و چاوەڕێی فیلمی دۆکیۆمێنتارییە.

هەشتەمین فێستیڤاڵی دۆکیۆمێنتاریی فیلمئامێد ئەمساڵ لە شاری ئامەد بەڕێوەدەچێت. ئەمساڵ کۆمەڵەی ئەکادیمیای سینەمای ڕۆژهەڵاتی ناوەڕاست (OSAD) و بەشێک لە ڕێکخراوە مەدەنییەکان پێکەوە فێستیڤاڵەکە ڕێکدەخەن.

کۆمەڵەی سینەمای ڕۆژهەڵاتی ناوەڕاست مەرجی پێشکەشکردنی بۆ فێستیڤالەکە ڕاگەیاند و بە پێی ئەو مەرجانە "پێش هەموو شتێک ئەو فیلمە دۆکیۆمێنتارییانەی بە هەر هۆکارێک سانسۆر کراون یا ناتوانرێت لە شوێنێکی دیکەدا نمایش بکرێن. ئەمساڵ هەشتەمین فێستیڤاڵی دۆکیۆمێنتاریی فیلمئامێد دەکەینە شوێنێک بۆ هاوبەشکردن و هەڵسەنگاندن و گفتوگۆکردن و پیشاندانی هەموو ئەو دۆکیۆمێنتارییانەی هیچ هێرش و سووکایەتییەکیان بەرانبەر بە هیچ شوناسێکی نەتەوەیی و ئایینی و سێکسی و کولتووریی تێدا نییە. بۆ فێستیڤاڵەکە،ئەو فیلمە دیکۆمێنتارییانەی کە لە پاش ساڵی ٢٠٢٠ەوە دروست کراون وەردەگیرێن".

پرۆسەی پێشکەشکردنی داواکاری بۆ فێستیڤالەکە لە ٣ی تەمموزەوە دەستی پێ کردووە و تا ٣١ی تەمموز بەردەوام دەبێت. فێستیڤاڵەکەی ئەمساڵ لە نێوان ٢٧ی ئەیلول تا ١ی مانگی دواتر بەڕێوەدەچێت.

داواکاریی بەشداریکردنی فیلمەکان لە ڕێگەی ماڵپەڕی filmamed.ortadogusinema.com تۆمار دەکرێت، واتە بە شێوەی ئۆنلاین دەبێت.

پشتگیری لە دروستکردنی فیلمی دیکۆمێنتاری دەکرێ

تیمی ڕێکخەری فێستیڤال ڕایانگەیاند پاڵپشتی لە بەرهەمهێنانی فیلمی دیکۆمێنتاری دەکەن. بەتایبەت ئەو پرۆژانەی تیشک بخەنە سەر پرسە کۆمەڵایەتییەکان، مافی مرۆڤ، جیاوازی، پرسی پەنابەران و یەکسانیی جێندەری کە ڕێز لە مافە ڕۆشنبیریەکان دەگرن و بە تایبەت ئەو فیلمانەی لە دیاربەکر و دەوروبەری بەرهەم هاتوون، دەتوانن پاڵپشتی وەربگرن.

ئەو کەسانەی دەیانەوێت پشتگیری بۆ فیلمەکانیان وەربگرن دەتوانن فۆڕمی داواکاری پڕبکەنەوە.