کوردشۆپ- ڕاگەیەندرا کە ڕۆژی ٢١ی حوزەیران لە شاری زاخۆ یەکەم فێستیڤاڵی "شەل و شەپکان" لە پردی دەلال بەڕێوە دەچێت. هەروەها شارەکانی هەولێر، دهۆک، زاخۆ، شرنخ، ئاکرێ و ئامێد و ناوچەی بارزان لەو فێستیڤاڵەدا بەشدارن و لە یەک ڕۆژدا چەندین جلوبەرگ پێشکەش دەکرێن.
دڵخواز مووسا، بەڕێوەبەری ڕۆشنبیری و هونەریی زاخۆ و هەروەها ئەندامی دەستەی بەڕێوەبردنی فێستیڤاڵی زاخۆ، ڕایگەیاند: مەبەست لەم فێستیڤاڵە پاراستنی جۆرەکانی شەل و شەپکانە و کردنی بە کولتوور و ڕوونکردنەوەی بۆ هەموو لایەک کە ئەو جلوبەرگانە تەنیا بۆ چینێکی کۆمەڵایەتیی دیاریکراو نییە.
دڵخواز مووسا باسی لەوەش کرد، پیشەسازیی ئەو جلوبەرگانە بۆ یەکەمجار لە شاری زاخۆ دەستی پێ کردووە، مێژووەکەی دەگەڕێتەوە بۆ سەدان ساڵ لەمەوبەر. ناوبراو ڕوونیشی کردەوە، سەرەتا جوولەکەکان ئەم کارەیان ئەنجام داوە و دوای ئەوەش مەسیحییەکانی ناوچەکە درێژەیان بەم کارە داوە؛ ئێستا بەشێک لە هاوڵاتییانی ناوچەکە سەرقاڵی ئەم کارەن.
بەڕێوەبەری ڕۆشنبیری و هونەریی زاخۆ ڕایگەیاند، ئامانجێکی تری ئەم فێستیڤاڵە نیشاندانی پێکەوەژیانی نێوان ئایین و پێکهاتەکانی ناوچەکەیە کە ساڵانێکە بە برایەتی و ئاشتی پێکەوە دەژین.
هەروەها دڵخواز مووسا ڕایگەیاند کە فێستیڤاڵەکە لە ٢١ی حوزەیرانی ٢٠٢٣، کاتژمێر ٦:٣٠ی پاشنیوەڕۆ لە پردی دەلال لە شاری زاخۆ دەست پێ دەکات و چەندین بەش و لقی جیاواز لەخۆ دەگرێت. نمایشی شەل و شەپکان بە بەشداریی ١٥ گەنج ئەنجام دەدرێت، دواتر جلوبەرگی خاک و کراس و فستان لەلایەن ٢٠ گەنجەوە پیشان دەدرێت و هاوکات لەگەڵ نمایشەکەدا، چۆنیەتیی دروستکردنیان ئاشکرا دەکرێت.
