کوردشۆپ- ئەنستیتیوتی کوردیی ئیستەنبوڵ لە چوارچێوەی چالاکییەکانی ١٥ی گوڵان، ڕۆژی زمانی کوردی، بەرنامەیەکی بەڕێوەبرد. بەرنامەکە لە ژێر ناوی "ئاهەنگگێڕان بە بۆنەی فێستیڤاڵی زمانی کوردی، پێدانی بڕوانامەی مامۆستایانی کوردی" بەڕێوەچوو.

ئەو بەرنامەیەی کە ڕۆژی 20/05/2023 لە هۆڵی ناوەندی ڕۆشنبیریی میزۆپۆتامیا ڕێکخرابوو، بە بەشداریی زیاتر لە ١٠٠ کەس بەڕێوە چوو. بەرنامەکە هەم بۆ یادی ٣١ ساڵەی دامەزراندنی ئینستیتیوتی کوردیی ئەستەنبوڵ، هەم بۆ ڕۆژی زمانی کوردی، هەم بۆ پێدانی بڕوانامە بەو کەسانەی بوونە مامۆستا بەڕێوەچوو.

سەرەتا فیلمێک بۆ یادی دامەزرێنەرانی ئینستیتیوتی کوردی لە ئەستەنبوڵ نمایش کرا. پاشان هاوسەرۆکی ئینستیتیوتی کوردیی ئەستەنبوڵ "ڕەزمیە ئاڵپ ئەرسلان" بەخێرهاتنی میوانەکانی کرد. هەروەها زمانناس زانا فارقینی باسی لە دامەزرێنەرانی ئینستیتیوتی کوردی کرد. فارقینی ئاماژەی بەوەش کرد، کاتێک ئینستیتیوتی کوردی دامەزرا، ئێمە خوێندکار بووین، دامەزرێنەرانی بۆ ئێمە چرایەک بوون. فارقینی سەرەتا مووسا عەنتەر و فەقێ حسێن ساگنیچ و دامەزرێنەرانی ئینستیتیوتی بە بیرهێنایەوە و گوتی "ئەو کەسانەمان دۆزییەوە؛ ئەوان ڕێبەرایەتیی ئێمەیان کرد. مووسا عەنتەر زۆر گرنگ بوو بۆ ئێمە، چونکە ئەو قاچێکی لە ناو دەستپێکی دامەزراندنی کۆماردا بوو. ئەو ئاگاداری هەموو شتێک بوو. دیتنی ئەو بۆ ئێمە مایەی شانازی بوو."

فارقینی تیشکی خستە سەر دامودەزگا کوردییەکان و باسی لە گرینگیی ئەم دامودەزگایانە کرد و وتی: "نابێت ئەم سەردەم و دامودەزگایانە بەتەنها جێ بهێڵرێن، بزووتنەوەکە پێویستە لە دامودەزگاکاندا جێگەی خۆی هەبێت. دەستەواژەی 'زمان شەرەفمانە' دەبێت لە ناو دەزگاکاندا تەنیا وەک دروشمێک نەبێت. زمانەکەمان دەنگی باوباپیرانمانە. ئەوان ئەم متمانەیەیان پێداین، با خیانەتی لێ نەکەین. با ئەم زمانە بگوازینەوە بۆ منداڵەکانمان."

دوای وتارەکان، گۆرانیبێژان سەبری ئاگری و محەممەد بەیرۆ بە دەنگی خۆیان چالاکییەکەیان ڕازاندەوە. پاشان بڕوانامەیان بەو کەسانە بەخشی کە لە خولەکانی پەیمانگا دەرچوون و بوون بە مامۆستا. ئەمساڵ ١٣ کەس بڕوانامەی وانەوتنەوەیان وەرگرت.

چالاکییەکە بە گۆرانییەکانی هونەرمەند مەروان تان و هونەرمەندانی ناوەندی ڕۆشنبیریی میزۆپۆتامیا کۆتاییی هات.