شادی
کوردشۆپ- هونەرمەندی کۆلارەساز "زاهید مونگان" کە خەڵکی شاری مێردینی باکووری کوردستانە، دوای دروستکردنی کۆلارەیەکی سێ ڕەهەندیی تاووس، لە وڵاتی چین بەشداریی فێستیڤاڵێکی کردووە و لەو فێستیڤاڵەدا میدالیای زێڕی بەدەست هێناوە.
هونەرمەند زاهید مونگان تەمەنی 32 ساڵە و خەڵکی شاری مێردینی باکووری کوردستانە. هەر لە منداڵییەوە لە کۆلارە دانەبڕاوە و ماوەی 26 ساڵە ئەو کارە دەکات و کردوویەتی بە پیشەی خۆی.
زاهید مونگان بە دروستکردنی کۆلارە بە شێوەی پیشەگەرانە، بۆ ٣٠ وڵات گەشتی کردووە و بە تەکنیکی تایبەتی چل پارچە، دوو هەزار پارچەی وەسەریەک خستووە و لە ماوەی ٥ مانگدا باڵۆنی تاووسێک و کەروێشکێکی دروست کردووە و لە چلەمین فێستیڤاڵی نێودەوڵەتیی کۆلارەی وەیفانگی چیندا بەشداریی کردووە.
لە فێستیڤاڵەکەدا، زاهید مونگان بە کۆلارەی تاووس لە بەشی "پەپوولە باڵدارە سێ ڕەهەندییەکان"، میدالیای زێڕی بەدەست هێنا. هەروەها لە بەشی "کۆلارەی جوان"دا میدالیای برۆنزی بەدەست هێنا.
زاهید مونگان سەبارەت بەم بابەتە دەڵێت، "خولیای بۆ کۆلارە لە تەمەنێکی بچووکەوە دەستی پێ کردووە و ئەو کولتوورە دەوڵەمەندەی ماردین لە کۆلارەکانیدا ڕەنگیان داوەتەوە".
مونگان دەڵێ: هەموو سەروەت و سامانە کولتوورییەکانی شارەکە و ئەفسانەکانی لە کۆلارەکانمدا وێنا کراوە. بۆ نموونە شاماران، هەروەها ئەو چوارپێیانەی لە شەقامە تەسکەکانماندا بۆ کاری پاککردنەوە بەکار دەهێنرێن، هەروەها کۆلارەی کۆتریشم دروستکردووە. لە کۆتاییدا باڵندەی تاووسم دروست کرد کە بۆ ئێزدییەکان پیرۆزە."
بە گوتەی زاهید مونگان، بۆ دروستکردنی کۆلارەی تاووس ڕووبەڕووی ئاستەنگی زۆر بووەتەوە و توانیویەتی بە تەکنیکی چل پارچە، لە ماوەی ٥ مانگدا کارەکە تەواو بکات. وتیشی: "لە دروستکردنی کۆلارەکەدا، هەموو پارچەکانیم بەیەکەوە دووریوە و بەم شێوەیە دروستم کردووە. زۆر بۆم دژوار بوو. هەوڵێکی زۆرم دا بۆ دورینی هەموو بەشەکانی. درێژیی کۆلارەکە ٦ مەتر و پانییەکەی ٥ مەترە."
زاهید مونگان وتی: "تا ئێستا بەشداریم لە زۆر چالاکیی لەو جۆرەدا کردووە، بەڵام لە ١٠ ساڵ لەمەوبەرەوە حەزم دەکرد لە فێستیڤاڵی نێودەوڵەتیی کۆلارەی چینی بەشداری بکەم" و ڕوونیشی کردەوە: "کاتێک باسی کۆلارەی باڵندە دەکەیت، پێش هەموو شتێک چین و ویفانگ دێنە مێشکمەوە. پایتەختی کۆلارەکانە. بۆ ئەو فێستیڤاڵە بانگهێشت کرابووم. لە فێستیڤاڵەکەدا کۆلارەی تاووسم فڕاند و بووم بە پاڵەوانی جیهان. لە فێستیڤاڵەکەدا کۆلارەکەم سەرنجێکی زۆری ڕاکێشا. سەدان بەشداربوو لە نزیکەی ٦٠ وڵاتەوە بەشداربوون. لەبەر ئەوەی لەو فێستیڤالەدا یەکەم هاتمەوە و میداڵیای زێڕم بەدەست هێنا زۆر دڵخۆشم و بۆ من جێگەی خۆشحاڵییەکی گەورەیە و خەڵاتی ماندووبوونەکانمم وەرگرت."
