Şadî

Kurdshop – Remezan Pîrosî yê ji bajarê Elkê ya ser bi parêzgeha Şirnex a Bakurê Kurdistanê ye û  xeyala xwe ya zaroktiyê pêk anî û pirtûka xwe ya helbestan belav kir.

Remezan Pîrosî ku bi xwe karkerê avahî saziyê ye, pirtûka wî ya helbestan  a bi navê ‘’ Bûka Çarkezî’’ ku ji tekoşîna jinên kurd bandor bûye û nivisandiye, di weşanên J&J de hat çap kirin û weşandin.

Remezan ku navê wî yê din jî Yîgît Pîrosî ye, di sala 1979an de li gundê Pîrosiya ya ser bi navçeya Elkê ya Şirnexê ji dayîk bûye. Sala 1990ê neçar ma li gundê xwe yê 600 malî koç bike.

Remezan ku li gel malbata xwe koçî Edenê dibe, weke karkerê cotkarî û çandinê kar dike.  Remezan, ku bavê 4 zarokane, debara xwe bi karkeriya avahî saziyê de derbas dike.

Remezan Pîrosî diyar kir ku demekî di navenda çandê ya Akdenîzê de bi şanoyê re mijûl bûye û di sala 2006’an de jî bi piştevanî û palderiya hevjîna xwe  ve dest bi nivîsandina helbestan kiriye û got, ‘’ Beriya ku ez helbestan binivsînim, min helbest dixwandin. Hevjîna min helbestên ku min dixwandin di eciband û hertim ji min re digot tu jî helbestan binivsîne. Li ser vê esasê min jî dest bi nivîsandina helbestan kir’’.

Remezan destnîşan kir ku wî di helbestên xwe de behsa tekoşîna jinên kurd ya li dijî neheqiya ku li wan tê kirin girtiye dest û got: ‘’ Tişta ku bû sedem ez helbastan binivsînim, zulm, zordarî û êşên me kişandî bûn. Dayîkên me hîn jî wan êşên ku dibin sedem em binivsînin dikşînin û jiyan dikin. Ji ber wê jî pêwîste em binivsînin.  Ji ber ku nivîsandinên me, ji bo nifşên paşerojê dibe bîr ango hafizeyeke dîrokî.  Ji ber vê jî herkesên ku bikaribin binivsînin, pêwîste êşên ku me kêşane binivsînin. Mînak ger gelek nivîskar û helbestvanên weke Cegerxwîn, Pîremerd, Meleya Cizîrî, Ehmedê Xanî, Feqiyê Teyran karîn roja me ya îro ronî bikin, divê em jî bikarin van rojan binivsînin û bîr a dîrokî ya nifşên paşerojê ronahî bikin.’’