Şêrko Janzêm

Kurdshop – Ji weşanên Peywendê du pirtûken nû yên Helîm Yûsivî derketin. Agirê Ku Bi Mala Me Ketîye, ev pirtûk ji nivîs û gotarên Helîm Yûsiv pêk tê.

“Agirê ku bi mala me ketiye mijara ku ev pirtûk behsa wî dike, agirê bişaftinê, yê asîmîlasyonê ye. Helîm Yûsiv xwe dide ber siya vî agirê ku roj bi roj gurtir dibe û dinîvisîne. Bi van gotar, helwest, nivîs, nirxandin û gernameyên xwe rewşa nivîskarî, weşangerî, werger, rexne, siyaset û çand, wisa jî têkiliya wêjeyê û civakê bi mînak û serpêhatiyan li ber çavan radixîne. Herweha gereke ber bi destnîşankirina wêneyê wêjeya kurdî di dîmenê giştî yê wêjeya cîhanê de ye. Ji bilî gelek agahiyên di derbarê çalakî, kesayet, pirtûk û bûyerên van bîst û pênc salên dawiyê de. Ev pirtûk di qadên wêjeya kurdî ya vê serdema me de rêwîtiyeke wisa ye ku, her kesê têkildar merema dilê xwe tê de dibîne. Ji ber ku zimanekî şayîk û naverokeke zelal hatine cem hev, her xwendevan dikare bibe hevparê vê rêwîtiya cihêreng.”

Pirtûka duyem; Ez Lawê Duhezar û Şeşsed Sal Ji Tozê Me, ev pirtûk ji 40 hevpeyvînên ku di dem û dîrokên cuda de bi Helîm Yûsiv re hatine kirin pêk tê.

“Ev pirtûk ji 40 hevpeyvînên ku bi Helîm Yûsiv re hatine kirin pêk tê. Di van hevpeyvînên di sîh salên nivîskariya wî de pê re hatine kirin, mirov li nirxandinên berfireh li ser giringtirîn bûyer û rûdanên wêjeyî û siyasî û civakî yên qada çandî ya kurdan rast tê. Bi çavên nivîskarekî ku hem bi berhemên xwe û hem bi beşdariya xwe ya takekesane di qada çanda kurdî de çalak bû, xwendevanên vê pirtûkê dikarin di derbarê dîmenê giştî yê wêjeya kurdî de bibin xwedî agahiyên giring. Herwisa dikarin hemû hûrgiliyan di derbarê jiyana Helîm Yûsiv û berhemên wî û dîtin û nirxandinên wî yên cihê de nas bikin.

40 Hevpeyvîn, hewildanên vekirina 40 derî û bi sedên pencereyan li ber wêjeya kurdî ye, ev wêjeya ku di nav dîwarên qedexekirin û zordarî û qirkirinê de asê maye.”