Şêrko JANZÊM
Kurdshop – Helbestvanê sirûda neteweyî “Ey Reqîb” Dildar (Yûnis Raûf) di 20ê Sibata 1918an de li Koye ji dayik bûye. 1948an li Hewlêrê koça dawî kiriye. Dildar di serdema guherînan û derketina rêbazên edebî de jiyaye. Di nav kurdan de amadehiyeke Klasîzm, Romantîzm û Realîzmê hebû, yanî ew di qonaxa dawî ya Klasîzmê, naverasta Romantîzmê û di destpêka Realîzmê de jiyaye. Ji ber vê, bi zelalî krokiya van rêbazan di helbestên wî de têne dîtin. Dema meriv li helbestên Dildar dinêre meriv bi zelalî tevliheviyeke van her sê rêbazan dibîne, loma diyarkirina rêbaza edebî ya helbestên Dildar ne hêsan e. Hinek ji helbestên wî bi temamî realîst in û ligel rastiya civaka kurdan ya wê demê re li hev dikin. Ew li gor serdema ku tê de jiyaye mînaka wan helbestvanan e ku helbestên nû yên kurdî ceribandiye. Li gor lêkolînên li ser nûkirina helbesta kurdî, ku Dildar ne yek ji damezrênerê dibistana Romantîzm û Realîzmê be jî bi dilniyayî ew yek ji wan edîbên ku helbesta kurdî di warê giranî, serwa, awaz, wate û peyvan ve nû kiriye. Heger meriv bi hûrî Dîwana Dildar bixwîne, meriv dibîne ku îdeolojiya wî, ji bingehê ve îdeolojiyeke pêşketî ya neteweya kurdan e. Di helbestên wî de mebest û armanca sereke, hişyarkirina neteweya kurd e ji paşvemayîn, nezanî û nedadperweriyê ye.
Remezan Hemedemîn
Dîwana Ey Reqîb ya helbestvanê neteweyî di sala 1948an de cara pêşî bi Soranî hatîye çapkirin. Piştî 75 salan vê carê bi awayê tîpguhêzî li Bakûrê Kurdistanê ji hêla weşanxaneya Avestayê ve hatîye çapkirin ku amadekarî û tîpguhêzî ya dîwanê ji hêla Şîyar Şerîf Berazî ve hatîye kirin Dîwan her wekî xwe bi zaravayê soranî maye lê bo alfabeya latînî tîpguhêzî hatiye kirin. Dîwan ji 36 helbestan pêk tê di dîwanê de bîyografîya Dildar bi kurdîya Kurmancî hatîye nivîsîn û dîsa di diwanê de ferhengokek jî hatîye amadekirin bo kurmancî û soranî. Di dîwana Dildar de her çend ku mijarên netewî hene wî carinan şîret li ciwan û zarokan jî kiriye
