Şadî
Kurdshop –Hat ragehandin 21ê meha Hezîranê li bajarê Zaxoyê, yekemîn festîvala Şal û Şapikan li pira Delal birêve diçe û li bajarên Hewlêr, Duhok, devera Barzan, Zaxo, Şirnex, Akrê û Amêdiyê, wê beşdarbûn çêbibe û di rojekî de çendîn cilûbergan pêşkêş bikin.
Birêvebirê Rewşenbîrî û Hunerî yê Zaxoyê û di heman demê de endamê Lijneya Rêvebirina Festivala Zaxoyê Dilxwaz Mûsa, ragehand armanca vê festîvalê, parastina cûreyên cilûbergên şal û şapikanin û lixwekirina wane ku bibe çand û ji her kesî re zelal bikin ku ev cilûberg bi tenê yên çîneke diyarkirî ya civakî nînin.
Dilxwaz Mûsa ragehand, pîşesaziya wan cilûbergan cara yekem li bajarê Zaxo, dîroka wê vedigere bo sedan sala berî naha û diyar kir, destpêkê cihûyan ev kar kiriye û piştî wê jî Xirîstiyanên navçeyê ev kar berdewam kirine û vê gavê jî beşek ji wan hemwelatiyên deverê bi vî karî re mijûl in.
Birêvebirê Rewşenbîrî û Hunerî yê Zaxoyê diyar kir, armanceke din a vê festîvalê, nîşandana bi hevre jiyan kirina di navbera ol û pêkhateyên navçeyê ye, ku bi salane bi biratî û tebayî li gel hev jiyan dikin.
Herwaha Dilxwaz Mûsa diyar kir ku festîval dê roja 21ê Hezîrana 2023’an demjimêr 18:30ê, li Pira Delal a bajarê Zaxoyê destpê bike û çendîn beş û birgeyên cuda li xwe digre û pêşandana şal û şapikan jî bi beşdariya 15 ciwanan ve tê encamdan, piştre jî cilûbergên xak û kiras û fistan ji aliyê 20 ciwanan ve têne pêşandan û tevî pêşandanê, çawaniya çêkirina wan jî tê eşkere kirin.
