Şopênerên hêja
Bi hilkefta serkeftina tîma topa pê ya Amedsporê bo dewra pileya yekem a Tirkiyê, em germtirîn pîrozbahiya xwe pêşkêşê alîgirên vê tîmê û hemû Kurdistaniyan dikin û hêvîxwaz in Amad Spor pişt serê hev tevahiya qonaxên serkeftinê bi dest bixe û wekî hertimî bibe cihê şanaziya alîgirên xwe û hemû xelkê Kurdistanê.
Werziş beşeke pir girîng û sereke ye ji bo tekezîkirin û mezinnîşandana nasnameya nîştimanî ya neteweyan. Hebûna tîmên nîştimanî yên welatan di hemû qadên werzişî yên cuda de û pêşbirkiyên cîhanî ku bi beşdariya van tîmên nîştimanî têne lidarxistin, nîşaneya girîngiya werzişê di vî warî da ye. Mixabin bi sedema bêparbûna xelkê Kurdistanê ji hebûna dewleta nîştimanî ya Kurdistanê, Kurdistan ji pêkhatina tîmên nîştimanî di warên cur bi cur ên werzîşê de bê par maye û di vî warî de jî ji civaka cîhanî ya werzîşê hatiye dûrxistin.
Lê çêkirina tîmên werzişî yên Kurdistanî di çarçoveya pêşbirkiyên navxweyî yên dewletên ku Kurdistan dagîr kirine, derfetek e ji bo bihevre girêdana werziş û nasnameya nîştimanî. Her lewma dagîrkerên Kurdistanê hemû demê hewl dane ku li hemû parçeyên Kurdistanê pêşiya derketina tîmên werzişî yên bihêz bigirin û eger tîmekê jî serî hildabe, bi hemû hêza xwe ve li dijî wê yekê derketine û hewl dane yan ji nav bibin yan lawaz bikin û bo aliyê xwarê daxînin.
Geşeya du tîmên Şîrîn Feraza Kirmaşanê û Serdara Bokanê li Rojhilatê Kurdistanê di heyama salên borî de û bêhêzkirin û bêdengkirina ji nişkê ve ya van tîmane ji aliyê dezgehên ewlehî yên Îranê ve, du mînakên eşkere yên wê siyaseta dijî Kurdan a dagîrkerên Kurdistanê ye.
Tîma topa pê ya Amed Spora Bakurê Kurdistanê ger ji aliyê şovênîzmên desthilata zordar ve rastî dijayetîkirinê hatiye û dijayetiya wê tê kirin, lê bi kêfxweşî ve heta niha kariye berdewam rêya serkeftinê bo aliyê lûtkeyê bipîve û niha bûye nûnerê dengê Kurdistaniyên her çar parçeyên Kurdistanê di qada werzişê de.
Her lewma em carek din pîrozbahiyê li tev werzişvanan û birêveberan û alîgirên vê tîmê dikin û hêviya serkeftina berdewam ji bo wan dixwazin.
Saziya KURDŞOPê
29ê Nîsana 2024an
