- KURDŞOP
Sibêdeha roja Pêncşemî 18ê Çileya 2024an, termê sê çiyagerên Kurd ên xelkê Nexedê ku roja Îna borî li navçeya Şinoyê kevtibûne bin reniyê, bi axê hate spartin. Pêka helsengandina çalkavanên beşdar di rêûresmê de, zêdetir ji çil hezar welatiyên Kurd di biaxspartina van çiyageran de beşdarî kiribûn.
Sibêdeha roja Îna vê heftiyê, girûpa çiyagerî ya Kawiyana Nexedê ku ji pênc kesan pêk hatibû, li bintara çiyayê Rindole li pişt gundê Zimê yê ser bi bajarê Şinoyê kevtine bin reniyê. Yek ji çiyagerên ku karîbû xwe rizgar bike tîmên hawarçûnê agehdar kiribû û her wê rojê bi hewla çiyagerên navçeyê û tîmên Heyva Sor a Şinoyê, yek din ji çiyageran hate rizgarkirin. Lê sê kes ji çiyageran ên bi navên “Mihemed Royan, Muhsên Ezîzî û Riza Kayişî” ku ketibûne bin reniyê heta roja Çarşemî nehatine peydakirin. Di heyama wan şeş rojan de sedan kes ji çiyagerên Rojhilatê Kurdistanê û xelkê gunên Zimê û Alkawê bi welatiyên bajarên Şino û Nexedê re li helmeta geriyan û vekolîna li pey van sê çiyageran beşdar bûn.
Di vê heyamê de xelkê gundê Zimê û welatiyên bajarê Şinoyê, ji xeynî beşdarîkirina çalakane ji geriyana pey çiyageran, bi dabînkirina xwarin û hewcehyên dinê ji bo tîmên geriyan û vekolînê û herwisa bi dabînkirina emrazên veguhastina tîman, roleke sereke di vê helmeta geriyanê de lîstin.
Lê mixabin berdewamiya barîna berfê û rabûna bahoz û bagerê li çiyayê Rindolê û geliyê ku çiyager lê wunda bûbûn, hewldan bi ser neketin. keşûhewa ewqas xirab bû ku metirsiya hatina reniyê dîsan hebû û çiyageran hişdarî dane xelkê xwebexş ku bi bê kelûpelên pêwîst ên çiyageriyê û berçavgirtina rêkarên xweparêziyê berê xwe nedine navçeyê.
Êvareya roja Duşemî hêzên Heyva Sor ji ber xirabiya keşûhewa vegeriyane gundê Zimê û ragihandin ku heta baştirbûna keşûhewa û bi dawîhatina befr û baranê venagerine navçeyê. Lê çiyagerên Kurd û xelkê navçeyê ji geriyana li pey van sê çiyagerên wundabûyî her berdewam bûn û di encamê de roja Çarşemî bi hewla wan girûpan termê hersê çiyageran hate peydakirin.
Sibêdeha roja Pêncşemî jî, bi amadebûna deyan hezar kes ji xelkê Rojhilatê Kurdistanê, termê wan sê çiyageran li çiyayê Sultan Yaqût yê Nexedê û li rex gora Mihemed Ewraz, çiyagerê efsaneyî yê Kurd bi axê hatine spartin.
