Seywan Îbrahîmî, mamosteyê zimanê Kurdî û endamê Desteya Birêveberiya Encumena Çandî-Civakî ya “Nojîn”ê ku ji aliyê Taya 106 a Dadgeha Tawanan a Sinê ve bi tometa “têkdana ewlehiya giştî” bi salek cezayê girtîgehê û dûrxistin ji warê xwe û 40 derbeyê qamçiyan hatibû sizadan, bi mebesta derbaskirina cezayê salek girtîgehê hate girtin û bo girtîgeha navendî ya bajarê Sinê hate veguhastin. Di Tîrmeha îsal de Dadgeha Pêdaçûna Îranê, cezayê yek sal girtîgehê û çil qamçiyan bi ser Seywan Îbrahîmî de sepandibû û cezayê dûrxistinê jî hatibû hilweşandin.
Seywan Îbrahîmî di dosyeyeke dinê de jî, ji aliyê Dadgeha Şoreş a bajarê Sinê ve, bi tometa “pêkanîna deste û girûp bi mebesta têkdana ewlehiyê” bi 10 sal û bi tometa "çalakî û propagende li dijî hikûmetê" bi salek cezayê girtîgehê hatibû sizadan. Ev dosyeye jî, li Dadgeha Pêdaçûnê ye û eger were erêkirin, dê ew mamosteye aliyê kêm cezayê deh salên din ê girtîgehê bi rê ve bibe.
Seywan Îbrahîmî ku hevjînê mamoste Zara Mihemedî ye, berî niha li ser rûpela xwe ya Instagramê ragihandibû ku; “Ji ber berpirsyaretî di Encumena Nojîn û çalakiyên vê encumenê, piştevaniya ji berxwedana hevjîna xwe, Zara Mihemedî, weşandina wêneyên şehîdan li ser torên civakî û herwisa pêwendiya bi kanaleke bi navê Kurd TV re” hatiye sizadan. Herwiha wî tekezî li ser wê yekê kiribû ku haya wî ji hebûna kanaleke bi navê Kurd TV nîne.
