Kurdshop. - Nivîskar û helbestvanê Kurd Mehmûd Sebrî ku bi nasnavê Evîndarê Xemgîn tê naskirin şeva borî li bajarê Hesekê yê Rojavayê Kurdistanê di temenê 86 saliyê de koça dawiyê kir.
Yekîtiya Nivîskarên Kurdistan a Sûriyê peyameke sersaxiyê belav kir û tê de ragihand, “Bi dilek xemgîn û kovan me nûçeya koça dawî ya nivîskar û helbestvanê Kurd Mehmûd Sebrî yê wek Evîndarê Xemgîn tê naskirin û endamê Yekîtiya Nivîskarên Kurdistan a Sûriyê wergirt, bi vê helkefta xemgîn û bi êş, em sersaxiyê ji malbata wî û hemû endamên Yekîtiyê û gelê me yê Kurd re dixwazin.”
Nivîskar Mehmûd Sebrî (Evîndarê Xemgîn) sala 1937an li gundê Çetela Kîkan yê ser bi Dirbêsiyê ve jidayîk bûye, zaroktiya xwe li gundê Melek, devera Dirbêsiyê derbas kiriye. Di heft saliya xwe de li cem melayê gund fêrî xwendina Erebî bûye.
Di sala 1965an de bawernameya Bekelorya bidest xistiye, sala 1970ê jî bawernameya Lîsansê ji zanîngeha Şamê, beşa mafnasî û yasayê bidest xistiye.
Mehmûd Sebrî Sernivîserê Govara Xunav bû û endamê Komîta Amedekar ya Mihrîcana Helbesta Kurdî bû û herwaha endamê Komîta Rexnegeriya Helbestan bû û 10 dîwan û berhemên bi Kurdî çap kiribûn.
