Şadî
Kurdshop – Ji bo cara yekemîn festîvala ‘’Sunflower’’ ango Gulberoj li Fînlandayê bi navê “Çand, Aştî û xwazayê” tê li darxistin û gelek fîlmên kurdî jî di festîvalê de tên pêşandan.
Festîvala Fîlm û Wêne ya Sunflower, festîvaleke fîlman a pirzimaniye ku li ser mijara aşitiyê hatiye ava kirin. Di bernamê de fîlmên ku li ser jiyana rojane, rewşa heyî ya çandî, xwezayê û çîroka jiyana li derveyî bajaran li Rojhilata Navîn hatine kişandin, tên pêşkêş kirin.
Di festîvalê de kurtefîlma Hîwa ya derhênera kurd Mojgan Kawisî, wek yekem fîlm hat pêşandan. Herwaha fîlm bi kurdî û bi jêrnivîsa Înglîziye û 15 hûrdem ango xulekan berdewam dike. Hîwa mamosteyekî kurd e, ku behsa metirsiya winda bûna zimanê kurdî ya kurdên ku di sedsala derbasbûyî de koçberî Kalar û deşta parêzgeha Mazenderan a Îranê kirine, dike. Herwaha ev kurte fîlma kurdî behsa krîza nasnameya zimanî dike û armanca wê jî, rêgirtina li ber windabûna çand û zimane.
Fîlmeke din a bi navê Balora ku ew jî kurdiye, behsa Balora kurdî dike. Balora awayekî ji stranên kevine ku ji aliyê jinên kurd ve hatiye gotin û êdî hatiye jibîr kirin. Ev şêwaza stranê bi teknîkeke cuda tê gotin, ango bi tiliyên li ser qirikê û bi rakirin û danîna tiliyan nota tên guhertin. Derhênerê fîlmê jî Ebdul Xalîdî ye.
Damezrînerê Festîvalê Resûl Xurem diyar kir, di festîvalê de 20 kurtefîlm û fîlmên dirêj yên bi zimanê Kurdî, Farisî, Erebî, Tirkî, Înglîzî û Swêdî wê bên pêşandan. Ji bilî pêşandana fîlman, wê çend panel li ser rexnegiriya fîlman bên li darxistin.
Biryar e ev festîval her sal li Fînlandayê bi hevkariya Muzexaneya Sosyolojiyê ya Helena Ravatavara were lidarxistin.
Festival duh 23.05.2023 dest pê kir û wê du rojên din jî berdewam bike.
Beşek ji navên fîlmên kurdî yên ku beştadî di festîvalê de dike.
- Hengaw Binên (Gav Bavêjin), derhêner: Mazin Şûrbayanî û Aryan Salih.
- Heft Semfoniyên Zagrosê, derhêner: Perwîz Rostemî.
- Nerm Wek Kanza, derhêner: Seywan Seidiyan.
- Nergiza pêncem, derhêner: Serkewt Nîkdil.
- Mîrkut, derhêner: Sîdat Kiran.
